കള്ളവോട്ട്​: സി.പി.എം പഞ്ചായത്ത്​ അംഗം ഉൾപ്പെടെ മൂന്നുപേർക്കെതിരെ ക്രിമിനൽ കേസ്​

കണ്ണൂർ: കാസർകോട് ലോക്സഭ മണ്ഡലത്തിലെ കണ്ണൂർ ജില്ലയിൽപെട്ട പിലാത്തറ എ.യു.പി സ്​കൂളിൽ കള്ളവോട്ട് ചെയ്ത സി.പി.എം പഞ്ചായത്ത്​ അംഗം ഉൾപ്പെടെ മൂന്നുപേർക്കെതിരെ പൊലീസ്​ ക്രിമിനൽ കേസെടുത്തു. തെരഞ്ഞെടുപ്പ്​ കമീഷൻ നിർദേശപ്രകാരം പരിയാരം മെഡിക്കൽ കോളജ് പൊലീസാണ്​ കേസെടുത്ത് അന്വേഷണം തുടങ്ങിയത്. ചെറുതാഴം പഞ്ചായത്ത് അംഗം എൻ.പി.സെലീന, മുൻ പഞ്ചായത്തംഗം കെ.പി.സുമയ്യ, പിലാത്തറ സ്വദേശി പത്മിനി എന്നിവർക്കെതിരെയാണ്​ കേസ് രജിസ്​റ്റർ ചെയ്തത്.

സെക്​ഷൻ 171ൽ സി,ഡി,എഫ് വകുപ്പുകൾ പ്രകാരമാണ് കേസ്. മൂന്നുപേരും ഒന്നിലധികം തവണ വോട്ടു ചെയ്യുന്നത് വെബ് കാമറയിൽ തെളിഞ്ഞിരുന്നു. ദൃശ്യങ്ങൾ ഉൾപ്പെടെ യു.ഡി.എഫ്, തെരഞ്ഞെടുപ്പ്​ കമീഷന്​ പരാതി നൽകുകയും കമീഷൻ നിർദേശപ്രകാരം ജില്ല കലക്ടർ അന്വേഷണം നടത്തി റിപ്പോർട്ടു നൽകുകയും ചെയ്തു. ഇവർ കമ്പാനിയൻ വോട്ടാണ് ചെയ്തതെന്നായിരുന്നു സി.പി.എം വാദം. എന്നാൽ, സി.പി.എം വാദം തള്ളിയാണ് പൊലീസും കേസ്​ രജിസ്​റ്റർ ചെയ്​തിരിക്കുന്നത്​. ആൾമാറാട്ടം, അന്യായമായി തെരഞ്ഞെടുപ്പിൽ ഇടപെടുന്നത് ഉൾപ്പെടെയുള്ള കുറ്റങ്ങളാണ് ഇവർക്കെതിരെ ചുമത്തിയിട്ടുള്ളത്.



അതിനിടെ, പാമ്പുരുത്തിയിൽ ലീഗ്​ പ്രവർത്തകർ കള്ളവോട്ട്​ ചെയ്​തെന്ന വാദവുമായി പാമ്പുരുത്തിയിലെ സി.പി.എം ബൂത്ത്​ ഏജൻറ്​ സി.കെ. മുഹമ്മദ്​ കുഞ്ഞ്​ തെരഞ്ഞെടുപ്പ്​ കമീഷനും കണ്ണൂർ ജില്ല കലക്​ടർക്കും പരാതി നൽകി. പാമ്പുരുത്തിയിലെ 116 നമ്പർ ബൂത്തിൽ ലീഗ്​ പ്രവർത്തകർ വ്യാപകമായി കള്ളവോട്ട്​ ചെയ്​തെന്നും അക്രമം നടത്തിയെന്നുമാണ്​ പരാതിയിൽ പറയു​ന്നത്​. വിഡിയോ ദൃശ്യങ്ങൾ പരിശോധിക്കണമെന്നും ആവശ്യപ്പെട്ടു. ഇതി​​െൻറ അടിസ്​ഥാനത്തിൽ വെള്ളിയാഴ്​ച കലക്​ടർ, സി.കെ. മുഹമ്മദ്​ കുഞ്ഞിനെ തെളിവെടുപ്പിന്​ വിളിപ്പിച്ചിട്ടുണ്ട്​. മലപ്പട്ടം​ കൊളന്ത എ.എൽ.പിയിലെ 187ാം നമ്പർ ബൂത്തിൽ 20 കള്ളവോട്ടുകൾ, മലപ്പട്ടത്തെ തന്നെ പൂക്കണ്ടം ആർ.ജി.എം യു.പി സ്​കൂളിലെ 191ാം നമ്പർ ബൂത്തിൽ 72, തലക്കോട്​ സ്​കൂളിലെ 192,193,194 എന്നീ ബൂത്തുകളിൽ 20 കള്ളവോട്ടുകൾ ഉൾ​പ്പെടെ 112 കള്ളവോട്ടുകൾ നടന്നുവെന്നുകാണിച്ച്​ യു.ഡി.എഫ്​ പഞ്ചായത്ത്​ കമ്മിറ്റി തെരഞ്ഞെടുപ്പ്​്​ കമീഷണർക്കും കണ്ണൂർ ജില്ല കലക്​ടർക്കു​ം പരാതി നൽകി. വെബ്​ കാമറ ദൃശ്യങ്ങൾ സഹിതമാണ്​ പരാതി.

അതേസമയം, കൂടുതൽ കള്ളവോട്ട്​ പരാതിയുമായി രംഗത്തുവരാനൊരുങ്ങുകയാണ്​ കോൺഗ്രസ്​. കണ്ണൂരിൽ കള്ളവോട്ട്​ ചെയ്​തവർക്കെതിരെയെല്ലാം ക്രിമിനൽ കേസ്​ കൊടുക്കുമെന്ന്​ ഡി.സി.സി പ്രസിഡൻറ്​ സതീശൻ പാച്ചേനി പറഞ്ഞു. കണ്ണൂർ ലോക്​സഭ മണ്ഡലത്തിൽ മാത്രം 20,000 കള്ളവോട്ടുകളാണ്​ സി.പി.എം ചെയ്​തിട്ടുള്ളത്​. 94 ബൂത്തുകളിലായാണ്​ കള്ളവോട്ടുകൾ നടന്നത്​. ഇവയുടെ വിഡിയോ ദൃശ്യങ്ങൾ ലഭിക്കുന്നതിന്​ വിവരാവകാശ നിയമപ്രകാരം അപേക്ഷ നൽകും. നിയമനടപടികൾ സ്വീകരിക്കുന്നതിനുള്ള പ്രാരംഭ ഒരുക്കങ്ങൾ ആരംഭിച്ചുവെന്നും അദ്ദേഹം പറഞ്ഞു.