എന്തൊരു ‘മാജിക്​’; ചെത്താനിവിടെ തെങ്ങില്ല, പക്ഷേ, കള്ള്​ കുടിക്കാനുണ്ടത്രേ...!

കോട്ടയം: തേങ്ങക്ക്​ വില കുതിച്ചതോടെ സംസ്ഥാനത്ത്​ ചെത്താൻ തെങ്ങില്ല, പക്ഷേ, കള്ള്​ഷാപ്പുകളിലാകട്ടെ യഥേഷ്ടം കള്ളും! എന്താണ്​ ഈ മറിമായത്തിന്​ പിന്നിലെന്ന കാര്യം മാത്രം അവ്യക്​തം​.

കള്ളുൽപാദനം പ്രോൽസാഹിപ്പിക്കാനും മുക്കിന്​ മുക്കിന്​ കള്ളുഷാപ്പുകൾ തുടങ്ങാനും സർക്കാർ പ്രോൽസാഹനം തുടരവെ ആവശ്യമായ കള്ളിനായി ‘കൃത്രിമം’ വ്യാപകമായി നടക്കുന്നെന്ന്​ വ്യക്​തം. സംസ്ഥാനത്ത്​ എത്ര കള്ളുഷാപ്പുകൾ പ്രവർത്തിക്കുന്നെന്ന വ്യക്​തമായ കണക്ക്​ പോലും സർക്കാറിന്‍റെ പക്കലില്ലാത്തതിനാൽ വ്യാജകള്ളുൽപാദനം വ്യാപകമാകുന്നെന്നാണ്​ ഇതിൽ നിന്നും വ്യക്​തമാകുന്നത്​. വിവിധ ജില്ലകളിൽ വിൽപന നടത്തുന്ന കള്ളിലെ ആൽക്കഹോളിന്‍റെ അളവിൽ വ്യത്യാസമുണ്ടെന്നതും കള്ള് വിൽപനയിലെ ‘കള്ളക്കളി’ വ്യക്​തമാക്കുന്നു.

കള്ളിനെ കേരളത്തിന്‍റെ തനത്​ പാനീയമാക്കും എന്ന പ്രഖ്യാപനമാണ്​ എക്​സൈസ്​ മന്ത്രി എം.ബി. രാജേഷിന്‍റേത്​. അത്​ മുന്നിൽ കണ്ടുകൊണ്ട്​ സംസ്ഥാനത്തിന്‍റെ വിവിധ ഭാഗങ്ങളിൽ ഫൈവ്​സ്റ്റാർ കള്ളുഷാപ്പുകൾ ഉൾപ്പെടെ കൂണുകൾ പോലെ ഉയരുകയാണ്​. ‘ഫാമിലി കള്ളുഷാപ്പുകൾ’ എന്ന ഓമനപ്പേരിട്ട്​ കേരളത്തിൽ പുത്തൻ ‘കള്ളുകുടി സംസ്കാരം’ മാറ്റുന്ന നിലക്കാണ്​ കാര്യങ്ങൾ. കള്ളുഷാപ്പുകൾക്ക്​ ഗ്രേഡിങ്​ ഉൾപ്പെടെ വിഭാവനം ചെയ്ത്​ സർക്കാറും അതിനെ ​പരമാവധി പ്രോൽസാഹിപ്പിക്കുന്നുമുണ്ട്​. എന്നാൽ ഈ ഷാപ്പുകളിലൂടെ എന്ത്​ കള്ളാണ്​ വിതരണം ചെയ്യുന്നതെന്നും അതിന്‍റെ വീര്യം എത്രയാണെന്നുമുള്ള പരിശോധനകളൊന്നും നടക്കുന്നില്ലെന്ന്​ മാത്രം. വ്യാജവാറ്റ്​ പിടികൂടാൻ എക്​സൈസിന്‍റെ നേതൃത്വത്തിൽ ചില റെയ്​ഡുകൾ നടക്കുന്നതല്ലാതെ കള്ളുഷാപ്പുകളിൽ വലിയ പരിശോധനയൊന്നുമില്ലെന്ന്​ ആ മേഖലയിൽ പ്രവർത്തിക്കുന്നവർ പോലും സമ്മതിക്കുന്നു.

നാളികേരത്തിന്റെ വില കുത്തനെ ഉയർന്നതോടെ തെങ്ങു ചെത്ത് വ്യാപകമായി കർഷകർ ഒഴിവാക്കുന്ന സാഹചര്യമാണ്​ പൊതുവിലുള്ളത്​. മുമ്പ്​ തന്നെ സംസ്ഥാനത്ത്​ പ്രവർത്തിക്കുന്ന ഷാപ്പുകൾക്ക്​ ആവശ്യമുള്ള കള്ള്​ ഉൽപാദിപ്പിക്കപ്പെടുന്നില്ലെന്ന്​ എക്​സൈസ്​ വകുപ്പിന്‍റെ തന്നെ കണക്കുകളിൽ വ്യക്​തമായതുമാണ്​. തെങ്ങ്​ ചെത്ത്​ കുറഞ്ഞിട്ടും കള്ളുഷാപ്പുകളുടെ എണ്ണം വർധിക്കുന്നതാണ്​ ഈ മേഖലയിലെ മായം കലർത്തൽ സംശയം വർധിപ്പിക്കുന്നത്​.

കള്ള്​ കൂടുതൽ ഉൽപാദിപ്പിക്കുന്ന ജില്ലകളിൽ നിന്നും മറ്റ്​ ജില്ലകളിലേക്ക്​ എത്തിച്ചാണ്​ വിൽപന നടത്തുന്നതെന്ന ന്യായമാണ്​ ഈ മേഖലയിലുള്ളവർ പറയുന്നത്​. എന്നാൽ മായം കലർത്തിയ കള്ളാണ്​ പലയിടങ്ങളിലും വിൽപന നടത്തുന്നതെന്ന ആക്ഷേപവും ശക്​തമാണ്​. തെങ്ങ്​ ചെത്ത്​ കുറഞ്ഞതോടെ മായ൦കലർത്തിയ തെങ്ങിൻകള്ള്​ വ്യാപകമായി എത്താൻ സാധ്യതയുണ്ടെന്നും അതിനാൽ പരിശോധന കർശനമാക്കണമെന്ന ആവശ്യവും ശക്​തമാണ്​.

കള്ളുൽപ്പാദിപ്പിച്ചുകൊണ്ടിരുന്ന തെങ്ങുകളിൽ മറ്റു രോഗങ്ങൾ കാര്യമായി ബാധിക്കാത്തതിനാൽ നല്ല ഫലലബ്​ധിയാണുള്ളത്​. നാളികേരത്തിന്​ നിലവിൽ കിലോക്ക്​ എൺപത്​ രൂപക്ക്​ മുകളിൽ കർഷകർക്ക്​ ലഭിക്കാൻ തുടങ്ങിയതോടെ കള്ള്ചെത്താൻ കൊടുക്കുന്നതിനേക്കാൾ ലാഭം നാളികേര വിൽപനക്കാണന്നതാണ്​ കള്ളുൽപാദനത്തിൽ നിന്ന്​ പിന്തിരിയാൻ അവരെ പ്രേരിപ്പിക്കുന്നതും. ഓണം ഉൾപ്പെടെ ആഘോഷവേളകൾ എത്തുന്ന സാഹചര്യത്തിൽ വ്യാജകള്ളുൽപാദനത്തിന്​ തടയിടാൻ എക്​സൈസ്​ പരിശോധന ശക്​തമാക്കണമെന്ന ആവശ്യവും ഉയരുകയാണ്​.

അതിനിടെ വിവിധ ജില്ലകളിൽ നിന്നും അധികൃതർ പരിശോധനക്കെടുത്ത കള്ളിൽ ആൽക്കഹോളിന്‍റെ അളവിലും വലിയ വ്യത്യാസമാണ്​ കാണുന്നത്​. നാല്​ ശതമാനം മുതൽ 8.98 ശതമാനം വരെയാണ്​ കള്ളിലെ ആൽക്കഹോളിന്‍റെ സാന്നിധ്യവും. അതിന്​ പുറമെ പല പേരിലുള്ള കള്ളുകളും ഷാപ്പുകളിലൂടെ വിൽക്കുന്നുണ്ട്​. ഇവയുടെ പരിശോധനയൊന്നും നടക്കുന്നില്ലെന്ന ആക്ഷേപവും ശക്​തമാണ്​.