ഒമ്പതക്ക നമ്പറിൽനിന്നുള്ള കാളെടുത്താൽ ഫോൺ പൊട്ടിത്തെറിക്കുമെന്ന് എ.സി.പിയുടെ പേരിൽ വ്യാജ സന്ദേശം

കൊച്ചി: ഒമ്പതക്ക നമ്പറിൽനിന്നുള്ള കാൾ എടുത്താൽ ഫോൺ പൊട്ടിത്തെറിക്കുമെന്ന് എറണാകുളം അസി. പൊലീസ് കമീഷണറുടെ പേ രിലുള്ള വ്യാജസന്ദേശം വാട്​സ്​​ആപ്പിലും മറ്റും അതിവേഗം പരക്കുന്നു. 777888999 എന്ന നമ്പറിൽനിന്ന്​ വരുന്ന കാൾ വൈറസ് ആ ണെന്നും പ്രതികരിച്ചാൽ ഫോൺ പൊട്ടിത്തെറിച്ച് അപകടമുണ്ടാകുമെന്നുമുള്ള മുന്നറിയിപ്പാണ് പ്രചരിക്കുന്നത്. എന്നാൽ, സന്ദേശം ത​േൻറതല്ലെന്നും ഉള്ളടക്കം തീർത്തും വസ്തുതവിരുദ്ധമാണെന്നും ചൂണ്ടിക്കാട്ടി എ.സി.പി കെ. ലാൽജി രംഗത്തെത്തി. സൈബർ ​െപാലീസ് അന്വേഷണവും ആരംഭിച്ചു.

ഫോൺ പൊട്ടിത്തെറിക്കുമെന്ന ഹിന്ദിയിലുള്ള മുന്നറിയിപ്പ്​ വിഡിയോ, ഇതേക്കുറിച്ച് മലയാളത്തിൽ വിശദമാക്കുന്ന ഓഡിയോ സന്ദേശം, ഓഡിയോ എ.സി.പിയുടേതാണെന്ന ടെക്സ്​റ്റ്​ സന്ദേശം എന്നിവയാണ്​ വാട്സ്​ആപ്പിൽ പറക്കുന്നത്​. ഹിന്ദി മനസ്സിലാകാത്തവർക്ക്​ വേണ്ടിയെന്ന സൂചനയോടെയാണ് എ.സി.പിയുടെ പേരിലുള്ള വ്യാജ ഓഡിയോ സന്ദേശം ഒപ്പംചേർത്തിട്ടുള്ളത്.

എന്നാൽ, ഏത് നമ്പറിൽനിന്നുള്ള കോൾ ആയാലും ഫോൺ പൊട്ടിത്തെറിക്കുകയെന്നത് ഒരിക്കലും സംഭവിക്കാത്തതാണെന്ന് എ.സി.പി ലാൽജി വ്യക്തമാക്കി. ‘‘ഫോണി​​​െൻറ ബാറ്ററിക്കോ മറ്റോ എന്തെങ്കിലും തകരാറുണ്ടെങ്കിൽ പൊട്ടിത്തെറിച്ചേക്കാം. എന്നാൽ, ഈ സന്ദേശത്തിൽ പ്രചരിക്കുന്നത് തീർത്തും വസ്തുതവിരുദ്ധവും അശാസ്ത്രീയവുമാണ്. ജനങ്ങളെ ആശങ്കയിലാക്കുന്ന സന്ദേശത്തിനെതിരെ അന്വേഷണം തുടങ്ങിയിട്ടുണ്ട്. പ്രചരിപ്പിക്കുന്നവർക്കെതിരെ നടപടിയും സ്വീകരിക്കും’’ -അദ്ദേഹം ‘മാധ്യമ’ത്തോട് പറഞ്ഞു. വിഡിയോ കൃത്രിമമായി നിർമിച്ചതാണെന്നും ഫോൺ ഇത്തരത്തിൽ പൊട്ടിത്തെറിക്കില്ലെന്നും ജനങ്ങൾ ആശങ്കപ്പെടേണ്ടതില്ലെന്നും സൈബർ ഫോറൻസിക് വിദഗ്ധൻ ഡോ. വിനോദ് പി. ഭട്ടതിരിപ്പാടും വ്യക്തമാക്കി.