യുവതികൾക്ക് അശ്ലീല  സന്ദേശമയക്കുന്ന വിരുതൻ പിടിയിൽ

നിലമ്പൂർ: യുവതികളുടെ മൊബൈൽ ഫോണിലേക്ക് അശ്ലീല സന്ദേശങ്ങൾ അയക്കുന്ന മൊബൈൽ ഷോപ്പ് ജീവനക്കാരനായ യുവാവ് അറസ്​റ്റിൽ. മുക്കം ഓടക്കയം സ്വദേശി പാറടിയിൽ കെൽവിൻ ജോസഫ് (22) നെയാണ് വഴിക്കടവ് എസ്‌.ഐ ബി.എസ്. ബിനു അറസ്​റ്റ്​ ചെയ്തത്. പ്രതി ജോലി ചെയ്യുന്ന അരീക്കോട് ടൗണിലെ ഫോറിൻ മൊബൈൽ ഷോപ്പിൽ ജനുവരിയിൽ അരീക്കോട് സ്വദേശി വിൽപ്പന നടത്തിയ ത‍‍​െൻറ മകളുടെ ഫോണിലുണ്ടായിരുന്ന സിം കാർഡ് പ്രതി രഹസ്യമായി സൂക്ഷിച്ച് വെച്ചിരുന്നു. 

ഈ സിം കാർഡ് ഉപയോഗിച്ചാണ് അശ്ലീല സന്ദേശങ്ങൾ അയച്ചിരുന്നത്. ഒരു യുവതിയുടെ ഫോണിലേക്ക് വാട്സ്​ആപ്​ വഴി അശ്ലീല സന്ദേശമെത്തി. സന്ദേശം വന്ന ഫോൺ നമ്പറിലേക്ക് യുവതിയും ബന്ധുക്കളും ബന്ധപ്പെടാൻ ശ്രമിച്ചെങ്കിലും സ്വിച്ച് ഓഫായിരുന്നു. വഴിക്കടവ് പൊലീസിൽ യുവതി നൽകിയ പരാതിയെ തുടർന്ന് സൈബർ സെല്ലി‍​െൻറ സഹായത്തോടെ നടത്തിയ അന്വേഷണത്തിലാണ് ഇയാൾ പിടിയിലായത്. സമാനരീതിയിൽ പ്രതി പല സ്ത്രീകളുടെ മൊബൈലിലേക്കും അശ്ലീല മെസ്സേജുകൾ അയക്കാറുണ്ടെന്ന് പൊലീസ് പറഞ്ഞു. അഡിഷണൽ എസ്‌.ഐ എം. അസൈനാർ, സി.പി.ഒ. പ്രശാന്ത് കുമാർ എന്നിവരും കേസന്വേഷണ സംഘത്തിലുണ്ടായിരുന്നു.