സെക്രട്ടേറിയറ്റിൽ വ്യാജ ബോംബ്‌ ഭീഷണി: ഫോൺ ചെയ്തയാൾ മനോരോഗിയെന്ന്​ പൊലീസ്​

തിരുവനന്തപുരം: സെക്ര​ട്ടേറിയറ്റിൽ ബോംബ്‌ ഭീഷണി മുഴക്കി ഫോൺ ചെയ്ത മാറനല്ലൂർ സ്വദേശി ബിബിൻരാജ്​ മനോരോഗിയെന്ന്‌ പൊലീസ്‌. മുമ്പും പലതവണ ഇയാൾ വ്യാജസന്ദേശം പ്രചരിപ്പിച്ചിട്ടുണ്ടെന്ന്​ പൊലീസ്‌ പറയുന്നു.

ഞായറാഴ്ച രാത്രി പത്തിനാണ്‌ സെക്രട്ടേറിയറ്റിൽ ബോംബ്​ വെച്ചതായി പൊലീസ്‌ കൺട്രോൾ റൂമിൽ ഫോൺ സന്ദേശമെത്തിയത്‌. തുടർന്ന്​ ബോംബ്‌ സ്ക്വാഡ്​ ഉൾപ്പെടെ സെക്രട്ടേറിയറ്റ്​ പരിസരത്തും വാഹനങ്ങളിലും പരിശോധന നടത്തിയെങ്കിലും ഒന്നും കണ്ടെത്താനായില്ല.

സൈബർ സെല്ലിന്‍റെ സഹായത്തോടെയാണ്‌ ഫോൺ ചെയ്‌തയാളെ കണ്ടെത്തിയത്‌. വാട്സ്​ആപ്പിൽ വന്ന സന്ദേശം പൊലീസിനെ അറിയിക്കുക മാത്രമാണ്‌ ചെയ്‌തതെന്നാണ്‌ ബിബിൻരാജ്​ നൽകിയ മൊഴി. ഇയാളെ കസ്റ്റഡിയിലെടുത്തിട്ടില്ല. കഴിഞ്ഞയാഴ്‌ച ആത്മഹത്യാശ്രമം നടത്തിയതിന്​ ചികിത്സയിലായതിനാലാണ്​ ഇതെന്നാണ്​ പൊലീസിന്‍റെ വിശദീകരണം.