വ്യാജ അഭിഭാഷക സെസി സേവ്യർ എട്ട് ദിവസം പൊലീസ് കസ്റ്റഡിയിൽ

ആലപ്പുഴ: അഭിഭാഷക ചമഞ്ഞ്​ തട്ടിപ്പ്​ നടത്തിയ കേസിൽ പ്രതിയായ സെസി സേവ്യറെ എട്ടുദിവസത്തേക്ക്​ ക്രൈംബ്രാഞ്ച്​ കസ്​റ്റഡിയിൽവിട്ടു. ക്രൈംബ്രാഞ്ച്​ നൽകിയ കസ്റ്റഡി അപേക്ഷ പരിഗണിച്ചാണ്​​​ മേയ്​ അഞ്ചുവരെ​ ചോദ്യംചെയ്യാനും കൂടുതൽ വിവരങ്ങൾ ശേഖരിക്കാനും കസ്റ്റഡിയിൽ വിട്ട്​ ആലപ്പുഴ ചീഫ്​ ജുഡീഷ്യൽ മജിസ്​ട്രേറ്റ്​ കോടതിയുടെ ഉത്തരവ്​​. 21മാസം ഒളിവിൽ കഴിഞ്ഞ വിവിധസ്ഥലങ്ങളിൽ കൊണ്ടുപോകാനും വ്യാജസർട്ടിഫിക്കറ്റ്​ നിർമിച്ചതടക്കമുള്ളവ കണ്ടെത്താനും കൂടുതൽ സമയം വേണമെന്ന ആവശ്യം കോടതി അംഗീകരിക്കുകയായിരുന്നു. ഈമാസം 12നാണ്​ കേസ്​ ക്രൈംബ്രാഞ്ച്​ ഏറ്റെടുത്തത്​.

കസ്റ്റഡിയിൽ വാങ്ങിയതിന്​ പിന്നാ​ലെ വിശദമായ ചോദ്യംചെയ്യൽ ആരംഭിച്ചതായി ക്രൈംബ്രാഞ്ച്​ ഡിവൈ.എസ്​.പി എം. രമേശ്​കുമാർ പറഞ്ഞു. അ​ന്വേഷണത്തിൽ ഡൽഹി, ഇന്ദോർ അടക്കമുള്ള സ്ഥലങ്ങളിൽ ഒളിവിൽ താമസിച്ചതായി വ്യക്തമായിട്ടുണ്ട്​​. കുറഞ്ഞസമയത്തിൽ എത്തിക്കാൻ പറ്റുന്ന സ്ഥലങ്ങളിൽ എത്തിച്ച്​ തെളിവെടുക്കും. എട്ടുദിവസം കുറവായതിനാൽ വിമാനമാർഗം കൊണ്ടുപോകുന്നതടക്കമുള്ള കാര്യങ്ങളും ആലോചനയിലുണ്ട്​.

മതിയായ യോഗ്യതയില്ലാതെ വ്യാജരേഖകൾ ഉപയോഗിച്ച്​ അഭിഭാഷകയായി പ്രാക്ടീസ് ചെയ്ത്​ തട്ടിപ്പ്​ നടത്തിയതിനാണ്​​ രാമങ്കരി നീണ്ടിശ്ശേരി വീട്ടിൽ സെസി സേവ്യറിനെതിരെ (29) സൗത്ത്​ പൊലീസ്​ കേസെടുത്തത്​. നിയമബിരുദം നേടാതെ തിരുവനന്തപുരം സ്വദേശിനി സംഗീത എന്ന അഭിഭാഷകയുടെ റോൾ നമ്പർ ഉപയോഗിച്ചാണ്​ പ്രാക്ടീസ്​ ചെയ്​തിരുന്നത്​. രണ്ടുവര്‍ഷത്തോളം ആലപ്പുഴ കോടതിയില്‍ പ്രാക്ടീസ് ചെയ്തു. ഇതിനിടെ ബാര്‍ അസോസിയേഷന്‍ തെരഞ്ഞെടുപ്പിൽ വിജയിച്ചു.

നിരവധി കേസുകളില്‍ ഇവരെ അഭിഭാഷക കമീഷനായും നിയമിച്ചു. ഇതിനിടെയാണ് സെസിക്ക്​ നിയമബിരുദമില്ലെന്നും വ്യാജരേഖകള്‍ ഉപയോഗിച്ചാണ് പ്രാക്ടീസ് ചെയ്യുന്നതെന്ന്​ കാണിച്ച്​ ബാര്‍ അസോസിയേഷന് ഊമക്കത്ത്​ ലഭിച്ചത്. തുടര്‍ന്ന് യോഗ്യത തെളിയിക്കുന്ന രേഖകള്‍ ഹാജരാക്കാന്‍ അസോസിയേഷന്‍ ആവശ്യപ്പെട്ടെങ്കിലും തയാറായില്ല.

തട്ടിപ്പ് കണ്ടെത്തിയ ബാർ അസോസിയേഷൻ ഇവരെ പുറത്താക്കി പൊലീസിൽ പരാതി നൽകിയതോടെ ഒളിവിൽ പോകുകയായിരുന്നു. നീണ്ടനാളത്തെ ഒളിവിനുശേഷം ഈമാസം 25ന്​ ആലപ്പുഴ ചീഫ് ജുഡീഷ്യൽ മജിസ്ട്രേറ്റ്​ കോടതിയിലാണ്​ സെസി ​സേവ്യർ കീഴടങ്ങിയത്​.