ഫേസ്ബുക്ക് വഴി വര്‍ഗീയ പരാമര്‍ശം നടത്തിയയാൾ അറസ്​റ്റില്‍

മലപ്പുറം: മത-സാമുദായിക വിദ്വേഷവും വര്‍ഗീയതയും പരത്തുന്ന രീതിയില്‍ ഫേസ്ബുക്ക് വഴി നിരന്തരം പരാമര്‍ശം നടത്തിയ കേസില്‍ ഒരാൾ അറസ്​റ്റിൽ. മഞ്ചേരി ആനക്കയം കളത്തിങ്ങല്‍പടി സ്വദേശി അസ്കറിനെയാണ് (47) മഞ്ചേരി പൊലീസ് അറസ്​റ്റ്​ ചെയ്തത്. ഇയാളുടെ ഫേസ്ബുക്ക് അക്കൗണ്ടില്‍ തുടർച്ചയായി വര്‍ഗീയ പരാമര്‍ശങ്ങളും സന്ദേശങ്ങളും പ്രചരിപ്പിക്കുന്നതായി രഹസ്യാന്വേഷണ വിഭാഗം കണ്ടെത്തിയിരുന്നു.

തീവ്രവാദ സംഘടനകളെ ന്യായീകരിക്കുന്ന രീതിയിലുള്ള പോസ്​റ്റുകളും ഇയാള്‍ പ്രചരിപ്പിച്ചതായി പൊലീസ് കണ്ടെത്തി. ജില്ല പൊലീസ് മേധാവിയുടെ നിര്‍ദേശപ്രകാരം മലപ്പുറം ഡിവൈ.എസ്.പി ജലീല്‍ തോട്ടത്തിൽ, മഞ്ചേരി സി.ഐ എൻ.ബി. ഷൈജു, എസ്.ഐ ഇ.ആര്‍. ബൈജു എന്നിവരടങ്ങിയ സംഘമാണ് അറസ്​റ്റ്​ ചെയ്തത്. മഞ്ചേരി ചീഫ് ജുഡീഷ്യല്‍ മജിസ്ട്രേറ്റ് കോടതി റിമാൻഡ്​ ചെയ്​തു.