കെ.എസ്.ആർ.ടി.സി ബസിലെ അതി​ക്രമം: പ്രതി പിടിയിലായില്ല

കോഴിക്കോട്: കെ.എസ്.ആർ.ടി.സി ബസ്​ യാത്രക്കിടെ കോഴിക്കോട്ടുകാരിയായ യുവതിക്കുനേരെ ലൈംഗികാതിക്രമമുണ്ടായ സംഭവത്തിൽ പ്രതി പിടിയിലായില്ല. ശനിയാഴ്ച രാത്രി തിരുവനന്തപുരത്തുനിന്നും കോഴിക്കോട്ടേക്കുള്ള യാത്രക്കിടെ എറണാകുളത്തിനും തൃശൂരിനുമിടയിലാണ് യുവതിക്ക്​ ദുരനുഭവമുണ്ടായത്​. കേസ്​ രജിസ്റ്റർ ചെയ്ത നടക്കാവ്​ പൊലീസ്​ യുവതിയിൽനിന്നും ഒപ്പമുണ്ടായിരുന്ന സുഹൃത്തിൽനിന്നും മൊഴിയെടുത്തു.

ബസിലെ റിസർവേഷൻ യാത്രക്കാരുടെ വിവരങ്ങളും ശേഖരിച്ചു. അന്വേഷണം പുരോഗമിക്കുകയാണെന്നാണ്​ പൊലീസ്​ പറയുന്നത്​. തൃശൂര്‍ എത്തുന്നതിനുമുമ്പ്​ തൊട്ടുപിറകിലെ സീറ്റിലിരുന്നയാള്‍ മോശമായി സ്പര്‍ശിച്ചുവെന്നാണ്​ യുവതിയുടെ പരാതി. ശരീരത്തിൽ സ്പർശിച്ചതോടെ എഴുന്നേറ്റ്​ എന്ത് വൃത്തികേടാണ് കാണിക്കുന്നതെന്ന് ചോദിച്ചതോ​ടെ അയാള്‍ മാപ്പുപറഞ്ഞ് ​മറ്റൊരു സീറ്റിലേക്ക്​ മാറി. എന്നാൽ, ഇതേക്കുറിച്ച് കണ്ടക്ടറോടും സഹയാത്രികരോടും പറഞ്ഞിട്ടും ഗൗരവത്തിലെടുത്തില്ലെന്നാണ്​ ആക്ഷേപം.

അതിനിടെ അതിക്രമം അറിയിച്ചിട്ടും ഇടപെടാതിരുന്ന കോഴിക്കോട്​ ഡിപ്പോയിലെ ഡ്രൈവർ കം കണ്ടക്ടർ വി.കെ. ജാഫറിനെ​ അന്വേഷണവിധേയമായി സസ്​പെൻഡ്​ ചെയ്തു. യാത്രക്കാരിയുടെ പരാതി അനുഭാവപൂർവം കേൾക്കാതെ കയർത്തുസംസാരിച്ചു, അനുമതിയില്ലാതെ മാധ്യമങ്ങളിലൂടെ സംസാരിച്ച്​ കോർപറേഷന്​ അവമതിപ്പുണ്ടാക്കി എന്നിവ ചൂണ്ടിക്കാട്ടിയാണ്​ നടപടി. കണ്ടക്ടറുടെയും സഹയാത്രികരുടെയും മൗനം, ബസിൽ നേരിട്ട അതിക്രമത്തെക്കാള്‍ മുറിവേല്‍പിച്ചുവെന്ന്​ യുവതി സമൂഹമാധ്യമങ്ങളിലൂടെ അറിയിച്ചതിനെ തുടർന്ന്​ സംഭവത്തിൽ ഉത്തരവാദികളായവർക്കെതിരെ കർശന നടപടി സ്വീകരിക്കുമെന്ന് ഗതാഗത മന്ത്രി ആന്‍റണി രാജു അറിയിച്ചിരുന്നു