സെലിബ്രിറ്റിക​​ളെ പരിചയപ്പെടുത്താമെന്നുപറഞ്ഞ്​ പണംതട്ടി; ഒരാൾ അറസ്റ്റിൽ

പാമ്പാടി: ഇവന്റ് മാനേജ്മെന്റിന് സെലിബ്രിറ്റികളെ പരിചയപ്പെടുത്താമെന്ന വ്യാജേന യുവാവിൽനിന്ന്​ പണം തട്ടിയയാളെ അറസ്റ്റ് ചെയ്തു. തൃശൂർ പഴയന്നൂർ സ്വദേശി എം. ഹക്കീമാണ്​ (46) പിടിയിലായത്​.

കോത്തല സ്വദേശിയായ യുവാവിനാണ്​ പല തവണയായി 64,000 രൂപ നഷ്ടമായത്​. വാട്​സ്ആപ്​ കാൾ മുഖേനയാണ്​ ബന്ധപ്പെട്ടത്​. സെലിബ്രിറ്റികളെ പരിചയപ്പെടുത്തി നൽകണമെങ്കിൽ പണം വേണമെന്നു പറഞ്ഞാണ്​ 2023 ജൂൺ മുതൽ പലതവണകളായി യുവാവിൽനിന്ന്​ ഇയാൾ 64,000 രൂപ വാങ്ങിയത്​.

പണം നഷ്ടപ്പെട്ടതിനെത്തുടർന്ന് യുവാവ് പൊലീസിൽ പരാതി നൽകി. പാമ്പാടി പൊലീസ് കേസെടുത്ത്​ ജില്ല പൊലീസ് മേധാവി കെ. കാർത്തിക്കിന്റെ നേതൃത്വത്തിൽ പ്രത്യേക അന്വേഷണസംഘം രൂപവത്​കരിച്ച്​ നടത്തിയ പരിശോധനയിൽ, ഹക്കീം തട്ടിപ്പിനായി ആരംഭിച്ച അക്കൗണ്ടിലേക്ക് പണം എത്തിയതായി കണ്ടെത്തി.

കോയമ്പത്തൂരിൽനിന്നാണ്​ പിടികൂടിയത്​. ആഡംബര കാറിൽ സഞ്ചരിച്ചുവന്നിരുന്ന ഇയാളെ അതിസാഹസികമായാണ് പിടികൂടിയത്​. 11 മൊബൈൽ ഫോൺ, 20 സിംകാർഡ്​, 20ൽപരം എ.ടി.എം കാർഡ്​, വിവിധ ബാങ്കുകളുടെ പാസ്ബുക്കുകൾ, 115 ഗ്രാം സ്വർണാഭരണം, വിവിധ പേരുകളുള്ള സീലുകൾ, വാഹനങ്ങളുടെ ആർ.സി ബുക്കുകൾ എന്നിവ കണ്ടെടുത്തു. ഇയാളുടെ ആഡംബര കാറിൽ തന്നെയായിരുന്നു താമസിച്ചുവന്നിരുന്നത്. കോടതി ഇയാളെ റിമാൻഡ് ചെയ്തു.

യാചകരുടെ പേരിൽ അക്കൗണ്ട്​ തുറന്നും തട്ടിപ്പ്​

പിടിയിലായ ഹക്കീം നിരവധി തട്ടിപ്പുകൾ നടത്തിയതായാണ് സൂചന. ഭിക്ഷാടകരുടെയും ആ​ക്രി പെറുക്കി വിൽക്കുന്നവരുടെയും പേരിൽ ബാങ്ക്​ അക്കൗണ്ട്​ തുറന്നാണ്​ തട്ടിപ്പ്​ നടത്തിയത്​. കേരളത്തിലും ഗൾഫിലുമുള്ള നിരവധി പേരാണ്​ തട്ടിപ്പിന്​ ഇരയായിരിക്കുന്നതെന്നാണ്​ പ്രാഥമികാന്വേഷണത്തിൽ വ്യക്തമായത്​.

ഇയാൾ സെക്കൻഡ് ഹാൻഡ് ഫോണുകൾ വാങ്ങി കോയമ്പത്തൂർ കലക്​ടറേറ്റിന്റെ ഭാഗത്തും ആശുപത്രിയുടെ പരിസരത്തും വഴിയരികില്‍ ഭിക്ഷ യാചിക്കുന്നവരെയും ആക്രി പെറുക്കിനടക്കുന്നവരെയും സമീപിച്ചാണ്​ ബാങ്കിൽ അക്കൗണ്ട്​ തുറന്നിരുന്നത്​. എ.ടി.എമ്മും പിൻനമ്പറും അക്കൗണ്ടിനായി കൊടുത്ത സിം കാർഡും 10,000 രൂപ നൽകിയാണ്​ ഇയാൾ വാങ്ങിയിരുന്നത്​. ഈ അക്കൗണ്ടുകൾ വഴിയാണ് പണമിടപാട് നടത്തിയിരുന്നത്.

ഇത്തരം സിംകാർഡ് വഴി ഫേസ്ബുക്കിൽ സ്ത്രീയുടെ പേരിൽ വ്യാജ അക്കൗണ്ട് ഉണ്ടാക്കുകയും കേരളത്തിലും ഗൾഫിലും സുഹൃത്തുക്കളെ ആവശ്യമുള്ളവർ ഈ പേജ് ഫോളോ ചെയ്യുക എന്ന തരത്തിൽ വാട്സ്ആപ് നമ്പർ കൊടുത്ത്​ പോസ്റ്റ് ചെയ്യുകയായിരുന്നു. ഇത്തരത്തിൽ ബന്ധപ്പെടുന്നവരോട്​ സ്ത്രീകളുമായി സൗഹൃദത്തിൽ ആകുന്നതിന് കൂടുതൽ പണം ആവശ്യപ്പെടും. പണം കൈക്കലാക്കി ഇവരുടെ നമ്പറുകൾ ബ്ലോക്ക് ചെയ്യുകയുമായിരുന്നു ഇയാളുടെ രീതിയെന്ന് അന്വേഷണത്തിൽ കണ്ടെത്തി.

ഈ കേസുമായി ബന്ധപ്പെട്ട് കൂടുതൽ അന്വേഷണം നടത്തിവരുകയാണെന്നും സമീപകാലത്ത് ഇത്തരത്തിൽ നടന്ന സൈബർതട്ടിപ്പുകളുമായി ഇയാൾക്ക് ബന്ധമുണ്ടോയെന്ന് അന്വേഷിച്ചുവരുകയാണെന്നും ജില്ല പൊലീസ് മേധാവി പറഞ്ഞു. പാമ്പാടി എസ്.എച്ച്.ഒ സുവർണകുമാർ, എ.എസ്.ഐ നവാസ്, സി.പി.ഒമാരായ സുമീഷ് മാക്മില്ലൻ, ശ്രീജിത്ത് രാജ് എന്നിവരും അന്വേഷണ സംഘത്തിലുണ്ടായിരുന്നു.