മൂന്നിടത്ത്​​ എൻ.ഡി.എ സ്ഥാനാർഥികളുടെ പത്രിക തള്ളി; സുപ്രീംകോടതിയെ സമീപിക്കുമെന്ന്​ ബി.ജെ.പി

തിരുവനന്തപുരം: അപേക്ഷ ഫോം പൂരിപ്പിച്ചതിലെ പിഴവിനെ തുടർന്ന്​ മൂന്നിടത്ത്​ എൻ.ഡി.എ സ്ഥാനാർഥികളുടെ പട്ടിക തള്ളി. ​ദേവികുളം, തലശ്ശേരി, ഗുരുവായൂർ മണ്ഡലങ്ങളിലെ സ്ഥാനാർഥികളുടെ പത്രികയാണ്​ തള്ളിയത്​. അതേസമയം, പത്രിക തള്ളിയതിനെതിരെ സുപ്ര ീംകോടതി​യെ സമീപിക്കുമെന്ന്​ ബി.ജെ.പി പ്രതികരിച്ചു.

ദേവികുളത്തെ എ.ഐ.എ.ഡി.എം.കെ സ്ഥാനാർഥിയായ ആർ.ധനലക്ഷ്​മിയുടെ പത്രികയാണ്​ തള്ളിയത്​. ഫോം പൂരിപ്പിച്ചതിലെ പിഴവിനെ തുടർന്നാണ്​ തെരഞ്ഞെടുപ്പ്​ ഉദ്യോഗസ്ഥരുടെ നടപടി​. ഡമ്മിയുടെ അടക്കം മൂന്ന്​ പേരുടെയും പത്രിക ഇവിടെ തള്ളിയിട്ടുണ്ട്​​.

തലശ്ശേരിയിൽ മത്സരിക്കുന്ന ബി.ജെ.പി സ്ഥാനാർഥിയുടേയും പത്രിക തള്ളി​. ബി.ജെ.പി ജില്ല പ്രസിഡന്‍റ്​ കൂടിയായ എന്‍. ഹരിദാസിന്റെ പത്രികയാണ് സൂക്ഷ്മ പരിശോധനയില്‍ വരണാധികാരി തള്ളിയത്.

സത്യവാങ്മൂലത്തോടൊപ്പം സമര്‍പ്പിക്കേണ്ട ഒറിജിനല്‍ രേഖകള്‍ക്കു പകരം പകര്‍പ്പ് സമര്‍പ്പിച്ചതാണ് പ്രശ്നമായത്. മണ്ഡലത്തില്‍ ബിജെപിക്ക് ഡമ്മി സ്ഥാനാര്‍ഥിയുമില്ല.

സിറ്റിങ് എംഎല്‍.എ അഡ്വ. എ എന്‍ ഷംസീറാണ് ഇവിടെ എല്‍.ഡി.എഫ് സ്ഥാനാര്‍ഥി. യു.ഡി. എഫിനു വേണ്ടി കോണ്‍ഗ്രസിലെ എം.പി. അരവിന്ദാക്ഷന്‍ ജനവിധി തേടുന്നു. വെൽഫെയർ പാർട്ടി സ്ഥാനാർഥിയായി ഷംസീർ ഇബ്രാഹിമും മത്സര രംഗത്തുണ്ട്.

ഗുരുവായൂർ മണ്ഡലത്തിലെ ബി.ജെ.പി സ്ഥാനാർഥി നിവേദിതയുടെ പത്രികയാണ്​ തള്ളിയത്​. മഹിള മോർച്ച അധ്യക്ഷയാണ്​ നിവേദിത. സംസ്ഥാന അധ്യക്ഷന്‍റെ ഒപ്പില്ലാത്തതാണ്​ പത്രിക തള്ളാനുള്ള കാരണം.