മണ്ണിടിച്ചിൽ സാധ്യത: ഏറാട്ട്കുണ്ട് കോളനിയിലെ കുടുംബങ്ങളെ മാറ്റിപ്പാര്‍പ്പിച്ചു

കൽപറ്റ: കാലവര്‍ഷക്കെടുതി നേരിടുന്നതി​െൻറ ഭാഗമായി മേപ്പാടി അട്ടമല ഏറാട്ട്കുണ്ട് കാട്ടുപണിയ കോളനിയിലെ മുഴുവന്‍ കുടുംബങ്ങളെയും മാറ്റിപ്പാര്‍പ്പിച്ചു. ആറു കുടുംബങ്ങളിലായുള്ള 28 പേരെയാണ് അട്ടമലയിലെ ഹാരിസണ്‍ മലയാളം എസ്​റ്റേറ്റിലെ കെട്ടിടത്തിലേക്ക് മാറ്റിയത്. മഴ കനക്കുന്നതോടെ പ്രദേശത്ത് മണ്ണിടിച്ചിലിനും ഉരുള്‍പ്പൊട്ടലിനുമുള്ള സാധ്യത ഏറെയാണ്. അപകടമുണ്ടായാല്‍ രക്ഷാപ്രവര്‍ത്തകര്‍ക്ക് എത്തിപ്പെടാനും ഏറെ പ്രയാസമാണ്. കഴിഞ്ഞ വര്‍ഷങ്ങളില്‍ ഇവിടെ മണ്ണിടിച്ചില്‍ ശക്തമായിരുന്നു.

ഈ സാഹചര്യത്തിലാണ് ജില്ല ഭരണകൂടത്തി​െൻറ നിര്‍ദേശാനുസരണം ഇവരെ സുരക്ഷിതമായ സ്ഥലത്തേക്ക് മാറ്റിയത്. മേപ്പാടി സാമൂഹികാരോഗ്യ കേന്ദ്രത്തിലെ മെഡിക്കല്‍ ഓഫിസര്‍ ടി.പി. ഷാഹിദി​െൻറ നേതൃത്വത്തില്‍ മെഡിക്കല്‍ പരിശോധന നടത്തിയതിനു ശേഷമാണ് ഇവരെ സുരക്ഷിത കേന്ദ്രത്തിലേക്ക് മാറ്റിയത്. 

ട്രൈബല്‍ വകുപ്പി​െൻറ നേതൃത്വത്തില്‍ ഇവര്‍ക്ക് ഭക്ഷണകിറ്റുകളും ഏര്‍പ്പാടാക്കിയിരുന്നു. ചൊവ്വാഴ്ച ഉച്ചക്ക് മൂന്നോടെയാണ് ദേശീയ ദുരന്തനിവാരണ സേനാംഗങ്ങളും പൊലീസും ഫയര്‍ഫോയ്‌സും വനം വകുപ്പ് ജീവനക്കാരും അടങ്ങിയ സംഘം കോളനിയിലേക്കെത്തിയത്. ജില്ല ഭരണകൂടത്തി​െൻറ നിര്‍ദേശം പാലിക്കണമെന്ന് അറിയിച്ചതോടെ കോളനിവാസികള്‍ മാറാന്‍ തയാറായി. 

ദുരന്തനിവാരണ പ്രവര്‍ത്തനങ്ങളും രക്ഷാപ്രവര്‍ത്തനങ്ങളും വിലയിരുത്തുന്നതി​െൻറ ഭാഗമായി ഏര്‍പ്പാടാക്കിയ മോക്ഡ്രില്ലി​െൻറ ഭാഗമായാണ് ഇവരെ മാറ്റിയത്. ഡിവൈ.എസ്.പി ടി.പി. ജേക്കബ്, തഹസില്‍ദാര്‍ ടി.പി. ഹാരിസ്, സര്‍ക്കിള്‍ ഇന്‍സ്‌പെക്ടര്‍ റജീന കെ. ജോസ്, കല്‍പറ്റ ഫയര്‍ ആൻഡ് റസ്‌ക്യു സ്​റ്റേഷന്‍ ഓഫിസര്‍ കെ.എം. ജോമി, ട്രൈബല്‍ സെല്‍ കോഓഡിനേറ്റര്‍ അക്ബര്‍ അലി തുടങ്ങിയവര്‍ മാറ്റിപ്പാര്‍പ്പിക്കലിന് നേതൃത്വം നല്‍കി.