ഡ്രോൺ പറത്തി വിദ്യാർഥി രക്ഷിച്ചത്​ നാല്​ ജീവനുകൾ; ദേവാംഗിന്​ ഇത് സന്തോഷ നിമിഷം​

തൃശൂർ: തളിക്കുളം തമ്പാൻ കടവിൽനിന്ന്​ മത്സ്യബന്ധനത്തിനുപോയ തൊഴിലാളികൾ സുഹൃത്തുക്കൾക്ക്​ നൽകിയ അപകട സന്ദേശത്തിൽ നിന്നാണ്​ എല്ലാത്തിന്‍റെയും തുടക്കം. പുലർച്ചെ ഏതാണ്ട്​ ഒന്നോയൊയിരുന്നു സംഭവം. തങ്ങൾ സഞ്ചരിച്ചിരുന്ന വള്ളം തകർന്നെന്നും രക്ഷിക്കണമെന്നുമായിരുന്നു ആ സന്ദേശം. വിവരമറിഞ്ഞ മത്സ്യത്തൊഴിലാളികൾ കടലിലേക്ക്​ കുതിച്ചു. ആറ്​ മണിക്കൂറോളം അവർ നടത്തിയ തെരച്ചിലിൽാ പ്രിയപ്പെട്ടവരിൽ ഒരാളെപ്പോലും കണ്ടെത്താനായില്ല. നിരാശയുടെ മണിക്കൂറുകളായിരുന്നു പിന്നീട്​.

ഗീതാ ഗോപി എം.എൽ.എ ഉൾപ്പടെ തിരച്ചിലിന്​ നേതൃത്വം നൽകാനെത്തിയിരുന്നു. ഈ സമയമാണ്​ എഞ്ചിനീയറിങ്​ വിദ്യാർഥിയായ ദേവാംഗ്​ അച്ഛനിൽ നിന്ന്​ മത്സ്യ​ത്തൊഴിലാളികളെ കടലിൽ കാണാതായ വിവരം അറിയുന്നത്​. എന്തുകൊണ്ട്​ തന്‍റെ കയ്യിലുള്ള ഡ്രോൺ ഉപയോഗിച്ച്​ അവർക്കായി തിരച്ചിൽ നടത്തിക്കൂട എന്ന ചിന്തയാണ്​ 19കാരനായ ദേവാംഗിനെ സംഭവസ്​ഥലത്ത്​ എത്തിക്കുന്നത്​. ദേവാംഗ്​ എത്തു​േമ്പാൾ ഫയർഫോഴ്​സ്​ ഉൾപ്പടെ തിരച്ചിൽ മതിയാക്കി മടങ്ങിയിരുന്നു. ആറ്​ മണിക്കൂറിലധികം കടലിൽ പിടിച്ചുനിൽക്കാൻ മത്സ്യത്തൊഴിലാളികൾക്ക്​ ആവില്ലെന്ന്​ അവരുടെ സുഹൃത്തുക്കൾപോലും പറഞ്ഞുതുടങ്ങിയിരുന്നു.

കൊച്ചിയിൽനിന്ന്​ ഹെലികോപ്​ടർ വന്നാലെ എന്തെങ്കിലും നടക്കൂ എന്നായിരുന്നു എല്ലാവരുടേയും അഭിപ്രായം. എങ്കിലും അവസാനവട്ട തിരച്ചിലിന്​ ഇറങ്ങാമെന്ന്​ ദേവാംഗ്​ ആത്മവിശ്വാസം പറഞ്ഞപ്പോൾ എല്ലാവരും അവനോടൊപ്പം നിന്നു. എം.എൽ.എ ഇടപെട്ട് ഡ്രോൺ പറത്താനുള്ള അനുമതി വാങ്ങിനൽകി. അങ്ങിനെ വള്ളത്തിൽകയറി ദേവാംഗ്​ കടലിലേക്ക്​ തിരിച്ചു. ഏകദേശം 15 നോട്ടിക്കൽ മൈൽ പിന്നിട്ടപ്പോൾ ഡ്രോണിന്‍റെ മോണിറ്ററിൽ ഒരുകുത്തുപോലെ എന്തോ ഒന്ന്​ കണ്ടു. ഡ്രോൺ താഴ്​ത്തി നോക്കിയപ്പോൾ കണ്ടത്​ കടലിൽ കയ്യിട്ടടിക്കുന്ന മനുഷ്യനെയാണ്​. എല്ലാവരും വള്ളത്തിൽ അദ്ദേഹത്തിന്‍റെ അടുത്തേക്ക്​ കുതിച്ചു.

തുഴയെറിഞ്ഞ്​ പിടിച്ചുകയറ്റി. പിന്നീട്​ എല്ലാം പെ​ട്ടെന്നായിരുന്നു. ആദ്യം കണ്ടയാളിന്‍റെ ​ഏകദേശം 200 മീറ്റർ ചുറ്റളവിൽ മറ്റ്​ മൂന്നുപേരേയും ദേവാംഗ്​ കണ്ടെത്തി. അവസാനത്തെയാളെ വള്ളത്തിലേക്ക്​ വലിച്ച്​ കയറ്റിയപ്പോഴേക്കും ബോധംകെട്ട്​ വീണെന്നും ദേവാംഗ്​ പറയുന്നു. ഇപ്പോൾ ഹൈദരാബാദിൽ എഞ്ചിനീയറിങിന്​ പഠിക്കുന്ന ദേവാംഗ്​ കോവിഡ്​ കാരണമാണ്​ വീട്ടിലുള്ളത്​. സ്‌കൂളില്‍ പഠിച്ചിരുന്ന കാലത്ത് വിനോദയാത്രക്കിടെ കാട്ടിലകപ്പെട്ട കൂട്ടുകാരേയും ദേവാംഗ് ഡ്രോണ്‍ ഉപയോഗിച്ച്​ കണ്ടുപിടിച്ചിട്ടുള്ളതായി സഹപാഠികൾ ഓർമിച്ചു.