യന്ത്രത്തകരാർ: ഷാർജ വിമാനം നെടുമ്പാശേരിയിൽ അടിയന്തിരമായി നിലത്തിറക്കി

നെടുമ്പാശേരി: യന്ത്രത്തകരാറിനെ തുടർന്ന് ഷാർജയിൽ നിന്നുള്ള വിമാനം നെടുമ്പാശേരിയിൽ അടിയന്തിരമായി നിലത്തിറക്കി. എയർ അറേബ്യയുടെ നെടുമ്പാശേരിയിലേക്കുള്ള വിമാനമാണ് രാത്രി 7.25 ന് നിലത്തിറക്കിയത്. സാധാരണ നടപടിക്രമങ്ങൾ പാലിക്കാൻ കാത്തുനിൽക്കാതെ പ്രത്യേക അനുമതി ​തേടിയാണ് വിമാനം ഇറങ്ങിയത്. നെടുമ്പാശേരിയിലേക്ക് പറക്കുന്നതിനിടെ പൈലറ്റിന് തകരാർ ബോധ്യപ്പെടുകയായിരുന്നു. തുടർന്ന് അധികൃതരുടെ സഹായം തേടി. വിമാനമിറങ്ങുമ്പോൾ നെടുമ്പാശേരിയിൽ സി.ഐ.എസ്.എഫ്, പൊലീസ്, മെഡിക്കൽ സംഘം തുടങ്ങിയവ സജ്ജരായി കാത്തുനിന്നു. 215 യാത്രക്കാരുമായി സുരക്ഷിതമായി തന്നെ നിലത്തിറക്കുവാൻ കഴിഞ്ഞതായി അധികൃതർ അറിയിച്ചു.