ഗതാഗതം നിയന്ത്രിച്ച ആളിന് ആനയുടെ ചവിട്ടേറ്റു; ചവിട്ടിയത് ‘തടത്താവിള രാജശേഖരൻ’

മയ്യനാട് (കൊല്ലം): ഉത്സവത്തിന്​ തിടമ്പേറ്റി വന്ന ആന ഗതാഗതം നിയന്ത്രിക്കുകയായിരുന്ന ആളെ ചവിട്ടി താഴെയിട്ടു. കൂട്ടിക്കട ഓട്ടോ സ്റ്റാൻഡിലെ ഓട്ടോറിക്ഷ തൊഴിലാളിയും തച്ചിലേഴികം ക്ഷേത്രത്തിന് സമീപത്തെ താമസക്കാരനായ മനോജിനാണ്​ ആനയുടെ ചവിട്ടേറ്റത്​. നിസ്സാര പരിക്കേറ്റ മനോജ് ആശുപത്രിയിൽ ചികിത്സ തേടി.

ഇരവിപുരം കൂട്ടിക്കട തച്ചിലഴികത്ത് ക്ഷേത്രത്തിലെ ഉത്സവത്തിന്‍റെ കെട്ടുകാഴ്ചകൾ കടന്നു വരുന്ന സമയത്താണ് സംഭവം. ഉത്സവത്തിനായി കൊണ്ടുവന്ന തടത്താവിള രാജശേഖരൻ എന്ന ആനയാണ് ചവിട്ടിയത്. ഉത്സവം നിയന്ത്രിക്കുകയും വാഹനങ്ങൾ ഗതാഗതക്കുരുക്കില്ലാതെ കടത്തിവിടുകയും ചെയ്യുകയായിരുന്നു മനോജ്.