അനിമേഷനാണ്​ തെരഞ്ഞെടുപ്പ് പ്രചാരണവും

ചങ്ങനാശ്ശേരി: തദ്ദേശ തെരഞ്ഞെടുപ്പിൽ നഗരസഭയില്‍ ഇടത്​-വലത്​ മുന്നണികളുടെ സീറ്റ് വിഭജനം പൂര്‍ത്തീകരിച്ചില്ല. എന്നാല്‍, സീറ്റ് ഉറപ്പിച്ചവർ പ്രചാരണം ആരംഭിച്ചു.

കൂട്ടംകൂടിയല്ലാതെയുള്ള വീടുകയറി പ്രചാരണവും നവമാധ്യമങ്ങളുപയോഗിച്ചുള്ള പ്രചാരണവുമാണ്​ നടക്കുന്നത്. തെരഞ്ഞെടുപ്പ് പ്രചാരണം കൂടുതലും ഹൈടെക്കായി. സ്ഥാനാർഥികളുടെ പുഞ്ചിരിക്കുന്ന മുഖമാണ് ഇപ്പോള്‍ സമൂഹമാധ്യമങ്ങളിലെ സ്​റ്റോറികളിലും പ്രൊഫൈലുകളിലും ടാഗുകളിലുമായി നിറഞ്ഞിരിക്കുന്നത്.

പോസ്​റ്ററുകളും അനൗണ്‍സ്മെൻറുകളും ന്യൂജെന്‍ തരംഗമായി സമൂഹമാധ്യമങ്ങളില്‍. വാട്സ്ആപ്, എഫ്.ബി, ഇൻസ്​റ്റ, എഫ്.ബി ഗ്രൂപ്പുകള്‍, വാട്സ്ആപ് ഗ്രൂപ്പുകള്‍ തുടങ്ങി നിരവധി ആപ്പുകളിലൂടെയും ഗ്രൂപ്പുകളിലൂടെയും പ്രചാരണം മുന്നേറുകയാണ്.

ഇതിനെല്ലാം പുറമേ, അനൗണ്‍സ്മെൻറുകളും മറ്റും വിഡിയോ രൂപത്തിലും കാര്‍ട്ടൂണ്‍ രൂപത്തിലും ഓഡിയോ രൂപത്തിലും ഇറങ്ങുന്നുണ്ട്. അനിമേഷന്‍ സംവിധാനത്തിലാണ് ഇത്തരത്തിൽ ഓടുന്ന വണ്ടിയും വിവിധ വിഡിയോ എഡിറ്റിങ്​ ആപ്പുകള്‍ ഉപയോഗിച്ച് ചിത്രങ്ങള്‍ പ്രയോജനപ്പെടുത്തിയുള്ള വിഡിയോകളും അനൗണ്‍സ്മെൻറുകളും ഇറങ്ങുന്നത്.