ആർ.എസ്​.എസുകാർ തെറ്റിദ്ധരിപ്പിച്ചു; വേദനയുണ്ടായ സമുദായത്തോട്​ ഖേദം പ്രകടിപ്പിക്കുന്നു -എൽദോസ്​ കുന്നംപള്ളി

പെരുമ്പാവൂർ: രാമക്ഷേത്ര നിർമാണത്തിന് സംഭാവന നൽകുന്ന ചിത്രം പുറത്തുവന്നതോടെ വിശദീകരണവുമായി എൽദോസ് കുന്നപ്പിള്ളി എം.എൽ.എ. ആർ.എസ്​.എസുകാർ രാമക്ഷേത്രമാണെന്ന്​ പറയാതെ തന്നെ തെറ്റിദ്ധരിപ്പിക്കുകയായിരുന്നെന്നും വേദനയുണ്ടായ സമുദായത്തോട്​ ഖേദം പ്രകടിപ്പിക്കുന്നതായും എൽദോസ്​ കുന്നംപള്ളി ഫേസ്​ബുക്കിൽ പങ്കുവെച്ച വിഡിയോയിൽ വിശദീകരിച്ചു.

''ഞാൻ എന്നും മതേതരത്വം ഉയർത്തുന്നയാളാണ്​. ഹിന്ദു, മുസ്​ലിം ക്രിസ്​ത്യൻ സമൂഹങ്ങൾ ഒരുമിച്ച്​ മുന്നോട്ട്​ പോകണമെന്ന്​ ആഗ്രഹിക്കുന്നു. ശബരിമലയിൽ വിശ്വാസികളുടെ കൂടെനിന്നയാളാണ്​ ഞാൻ. പൗരത്വ ഭേദഗതി നിയമത്തിനെതിരെ ഭരണഘടന സംരക്ഷണ യാത്ര നടത്തിയിട്ടുണ്ട്​. ആർ.എസ്​.എസിന്‍റെയും ബി.ജെ.പി​േൻറയും ലക്ഷ്യം കോൺഗ്രസിനെ തകർക്കലാണ്​. ആർ.എസ്​.എസ്​ പറയുന്നത്​ തന്നെയാണ്​ സി.പി.എമ്മും പ്രചരിപ്പിക്കുന്നത്​.

ഇരിങ്ങോക്കാവിന്‍റെ സമീപത്ത്​ നിന്നും ഇന്നലെ ഒരു പറ്റം ആളുകൾ കാണാൻ വന്നു. അവർ ആർ.എസ്​.എസുകാരാണെന്നോ ലക്ഷ്യം കബളിപ്പിക്കലോ ആണെന്ന് എനിക്കറിയില്ലായിരുന്നു​. അവരവിടെ വന്ന്​ ഒരുവഴിപാട്​ കൊടുക്കണ​മെന്ന്​ പറഞ്ഞപ്പോൾ തിരക്കിനിടയിൽ എന്‍റെ നിഷ്​കളങ്കത കൊണ്ട്​ 1000രൂപ കൊടുത്തുവെന്നത്​ ശരിയാണ്​. എല്ലാ മതക്കാർക്കും ഞാനിങ്ങനെ കൊടുക്കാറുണ്ട്​.

എന്നാൽ ആർ.എസ്​.എസുകാർ എന്നെ തെറ്റിദ്ധരിപ്പിക്കുകയായിരുന്നു. എനിക്കിതിൽ കടുത്ത വേദനയുണ്ട്​. അവർ തന്ന ഫോ​ട്ടോ ഞാൻ ശ്രദ്ധിച്ചില്ല. അതുമൂലം ഒരു സമുദായത്തിനുണ്ടായ വേദന അറിയുന്നു. ആ സമുദായത്തോട്​ ഖേദം പ്രകടിപ്പിക്കുന്നു. ഈ പ്രശ്​നത്തിൽ എന്‍റെ നിസ്സഹായാവസ്ഥ മനസ്സിലാക്കണം. ആർ.എസ്​.എസ​ിനോട്​ മാന്യമായ രാഷ്​ട്രീയ പ്രവർത്തനം നടത്തണമെന്നാണ്​ പറയാനുള്ളത്​'' -എൽദോസ്​ കുന്നംപള്ളി പറഞ്ഞു.