എടത്തല മർദനം: മൂന്ന് പൊലീസുകാരെ ചോദ്യംചെയ്തു

ആലുവ: എടത്തലയിൽ യുവാവിനെ ക്രൂരമായി മർദിച്ച സംഭവത്തിൽ മൂന്ന് പൊലീസുകാരെ അന്വേഷണസംഘം ചോദ്യംചെയ്തു. ബൈക്ക് യാത്രികനായ കുഞ്ചാട്ടുകര മരത്തുംകുടി ഉസ്മാനെ മർദിച്ചെന്ന പരാതിയിൽ എ.എസ്.ഐ പുഷ്പരാജ്, സീനിയർ സി.പി.ഒ ജലീൽ, സി.പി.ഒ അഫ്‌സൽ എന്നിവരെ കളമശ്ശേരി എ.ആർ ക്യാമ്പിലാണ് ക്രൈംബ്രാഞ്ച് ഡിവൈ.എസ്.പി ഉദയഭാനുവി​​​െൻറ നേതൃത്വത്തിൽ ചോദ്യംചെയ്തത്. മൂവരെയും എടത്തല സ്‌റ്റേഷനിൽനിന്ന്​ എ.ആർ ക്യാമ്പിലേക്ക് സ്‌ഥലം മാറ്റിയിരുന്നു.

മർദനമേറ്റ് ചുണങ്ങംവേലിയിലെ സ്വകാര്യ ആശുപത്രിയിൽ ചികിത്സയിൽ കഴിയുന്ന ഉസ്മാനെ തിങ്കളാഴ്ച അന്വേഷണസംഘം ചോദ്യംചെയ്തിരുന്നു. പൊലീസി​​​െൻറ കൃത്യനിർവഹണത്തിന് തടസ്സം സൃഷ്​ടിച്ചെന്ന പരാതിയിൽ ഉസ്മാൻ റിമാൻഡിലായതിനാൽ കോടതി അനുമതിക്ക് വിധേയമായാണ് ചോദ്യംചെയ്തത്. 

ഉസ്മാൻ പ്രകോപനം സൃഷ്​ടിച്ച് ആദ്യം കൈയേറ്റം ചെയ​്​തെന്ന നിലപാടാണ് പൊലീസുകാരുടേത്. അപകടം ഉണ്ടായത് മറ്റൊരു ഇരുചക്ര വാഹനവുമായാണെന്നും പിന്നീട് ഉസ്മാൻ പ്രശ്നത്തിൽ ഇടപെ​​െട്ടന്നും പൊലീസുകാർ മൊഴി നൽകിയതായി സൂചനയുണ്ട്. 

അതേസമയം, പൊലീസ് അകാരണമായി മർദി​െച്ചന്ന നിലപാട് ഉസ്മാൻ ആവർത്തിച്ചു. സംഭവത്തിലെ മുഖ്യസാക്ഷി കാറിലുണ്ടായിരുന്ന പോക്‌സോ കേസിലെ പ്രതി മുതിരക്കാട്ടുമുകൾ ചക്കിക്കല്ലുപറമ്പ് വീട്ടിൽ സിദ്ധാർഥും റിമാൻഡിലാണ്. ഇയാളെ അന്വേഷണസംഘം കസ്‌റ്റഡിയിൽ വാങ്ങി മൊഴിയെടുക്കും.