പുൽപള്ളി സഹകരണ ബാങ്കിലെ വായ്പ ക്രമക്കേടിൽ ഇ.ഡി അന്വേഷണം

പുൽപള്ളി: പുൽപള്ളി സർവിസ്​ സഹകരണ ബാങ്കിലെ വായ്പാക്രമക്കേടിനെക്കുറിച്ച് ഇ.ഡി അന്വേഷണം. മുൻ ഭരണസമിതിയുടെ കാലത്ത് 8.34 കോടി രൂപയുടെ തട്ടിപ്പ് നടന്നതായി അന്വേഷണത്തിൽ കണ്ടെത്തിയിരുന്നു. ഈ കാലത്ത് ബാങ്കിൽ നടന്ന ഇടപാടുകൾ സംബന്ധിച്ചാണ് അന്വേഷണം നടക്കുക. ഇതിന്‍റെ ഭാഗമായി പഴയ സാമ്പത്തിക ഇടപാടുകളുടെ രേഖകൾ എൻഫോഴ്സ്​മെന്‍റ് ഡയറക്ടറേറ്റ് ആവശ്യപ്പെട്ടു. കള്ളപ്പണ നിരോധന നിയമപ്രകാരമാണ് അന്വേഷണം.

മുൻ ഭരണസമിതിയുടെ കാലത്ത് നൽകിയ മുഴുവൻ വായ്പകളുടെയും നിക്ഷേപത്തിന്‍റെയും വിവരങ്ങൾ അറിയുന്നതിനായി ഇ.ഡിയുടെ കോഴിക്കോട് ഓഫിസിൽനിന്ന് ബാങ്ക് സെക്രട്ടറിക്ക് കത്തയച്ചു. 2015-17 കാലയളവിലെ ഇടപാടുകളാണ് അന്വേഷിക്കുന്നത്. കെ.പി.സി.സി ജനറൽ സെക്രട്ടറി കെ.കെ. അബ്രഹാമും ഇന്‍റേണൽ ഓഡിറ്റർ പി.യു. തോമസും ഉൾപ്പെടെയുള്ളവർ അന്വേഷണപരിധിയിൽ വരും.

ക്രമക്കേടുകൾ കണ്ടെത്തിയതിനെ തുടർന്ന് 2018ൽ ബാങ്ക് ഭരണസമിതിയെ പിരിച്ചുവിട്ടിരുന്നു. തുടർന്ന് അഡ്മിനിസ്​ട്രേറ്റർ ഭരണത്തിലായിരുന്നു ബാങ്ക്. സമീപകാലത്താണ് ബാങ്കിൽ വീണ്ടും തെരഞ്ഞെടുപ്പ് നടന്നത്. ഇ.ഡി അന്വേഷണത്തിലൂടെ സത്യം പുറത്തുവരുമെന്നാണ് അന്നത്തെ ബാങ്ക് പ്രസിഡന്‍റായിരുന്ന കെ.കെ. അബ്രഹാം പറഞ്ഞത്.