ഇടുക്കിയിൽ നേരിയ ഭൂചലനം

ചെറുതോണി: ഇടുക്കിയിൽ വീണ്ടും ഭൂചലനം. തിങ്കളാഴ്ച പുലർച്ച 4.52നായിരുന്നു നേരിയ ഭൂചലനം അനുഭവപ്പെട്ടത്. നാശനഷ്​ടങ്ങളൊന്നും റിപ്പോർട്ട് ചെയ്തിട്ടില്ലെങ്കിലും ഇത്​  നാട്ടുകാരിൽ കനത്ത ആശങ്കയുളവാക്കി. ചെറുതോണി, പൈനാവ്, തടിയമ്പാട്, കരിമ്പൻ, ചേലച്ചുവട് മേഖലകളിൽ ചെറിയ മുഴക്കത്തോടെയായിരുന്നു ഭൂചലനം. പുലർച്ചയായതിനാൽ എന്താണ് സംഭവിക്കുന്നതെന്ന് ആദ്യം വ്യക്തമായില്ല. ഒരുമണിക്കൂറിനു ശേഷമാണ് ഭൂചലനമാണെന്ന് സ്ഥിരീകരിക്കുന്നത്. 

മൂലമറ്റം വൈദ്യുതി നിലയത്തിലും കുളമാവ് അണക്കെട്ടിലും ഇടുക്കി അൺലോക്​​ സിസ്​റ്റത്തിലുമാണ് ഭൂകമ്പമാപനികളുള്ളത്. സംഭവം നടന്നയുടൻ വൈദ്യുതി ബോർഡി​​െൻറ ഗവേഷണ വിഭാഗം പരിശോധിച്ച കുളമാവിലെ മാപനിയിലാണ് ഭൂകമ്പതരംഗം രേഖപ്പെടുത്തിയതായി കണ്ടെത്തിയത്. ഇടുക്കി അണക്കെട്ടിൽനിന്ന്​ 10 കി.മീ. അകലെ കുളമാവിനു സമീപമാണ് പ്രഭവകേന്ദ്രം. 2.2 ആയിരുന്നു തീവ്രത.  
ഭൂചലനം മൂലം ഇടുക്കിയിലെ അണക്കെട്ടുകൾക്ക് തകരാറൊന്നുമില്ലെന്ന് പരിശോധന നടത്തിയ വൈദ്യുതി ബോർഡിലെ ഗവേഷണ വിഭാഗം വ്യക്തമാക്കി. മറ്റു അണക്കെട്ടുകളിലും പരിശോധന നടത്തുന്നുണ്ട്. എന്നാൽ, ഇടുക്കി അണക്കെട്ട് സ്ഥിതിചെയ്യുന്ന സ്ഥലത്തുനിന്ന്​ നാലുഭാഗത്തേക്കും മാറ്റൊലി ഉണ്ടായതായി രേഖപ്പെടുത്തിയിട്ടുണ്ട്. അണക്കെട്ട്​  കമീഷൻ ചെയ്തതിനുശേഷം 1988 ജൂൺ ഏഴിനാണ് ആദ്യത്തെ ഭൂചലനം. അതി​​​െൻറ പ്രഭവകേന്ദ്രം നെടുങ്കണ്ടമായിരുന്നു. 

ഡിജിറ്റൽ ഭൂകമ്പമാപനിയുണ്ടെങ്കിലും 35 വർഷം മുമ്പ് അമേരിക്കൻ കമ്പനിയായ െട്രയിൽ ഡൈയിൽ ജിയോടെക് നൽകിയ ഭൂകമ്പമാപനി ഉപയോഗിച്ചുള്ള പരിശോധനയാണ് ഇപ്പോഴും നടക്കുന്നത്​. ഇടുക്കിയിൽ ഭൂചലന നിരീക്ഷണ കേന്ദ്രം സ്ഥാപിക്കുമെന്ന് വാഗ്ദാനം നൽകിയെങ്കിലും നടന്നില്ല. ഇടുക്കിയിൽ അണക്കെട്ടുകളുമായി ബന്ധപ്പെട്ട് 12 ഭൂകമ്പമാപനികൾ ഉണ്ടെങ്കിലും പലതും കാലഹരണപ്പെട്ടു. ചിലതെല്ലാം ഡിജിറ്റലിലേക്ക് മാറി. ഏറ്റവും ഒടുവിൽ 2012 സെപ്റ്റംബർ രണ്ടിനാണ് ഭൂചലനം അനുഭവപ്പെട്ടത്. റിക്ടർ സ്​കെയിലിൽ 1.5 തീവ്രത രേഖപ്പെടുത്തിയ ഭൂചലനത്തി​​െൻറ പ്രഭവകേന്ദ്രം കരിങ്കുന്നത്തിനും പുറപ്പുഴക്കും മധ്യേയായിരുന്നു.