മെട്രോ രണ്ടംഘട്ടത്തിൽ ഉണ്ടാകില്ല: ഉദ്​ഘാടനത്തിന്​ ക്ഷണമില്ലാത്തിൽ വിഷമമില്ലെന്ന്​ ഇ.ശ്രീധരൻ

കൊച്ചി: മെട്രോ ഉദ്​ഘാടനത്തിന്​ വേദിയിലേക്ക്​ ക്ഷണിക്കാത്തതിൽ വിഷമമില്ലെന്ന്​ ഡി.എം.ആർ.സി മുഖ്യ ഉപദേഷ്ടാവ് ഇ.ശ്രീധരൻ. പ്രധാനമന്ത്രി നരേന്ദ്ര മോദിയുടെ സുരക്ഷയാണ്​ പ്രധാനം. പ്രധാനമന്ത്രിയുടെ ഒാഫീസ്​ അതിനനുസരിച്ചാണ്​ ലിസ്​റ്റ്​ തയാറാക്കിയിട്ടുള്ളത്​. സുരക്ഷാ ഏജന്‍സി എന്താണ് പറയുന്നത് അതു പോലെ ചെയ്യണം. അതിനാൽ തന്നെ വേദിയിലേക്ക്​ ക്ഷണിക്കാത്തത്​ വിഷമിപ്പിക്കുന്ന കാര്യമല്ലെന്നും ഉദ്​ഘാടന ചടങ്ങിൽ താൻ പ​െങ്കടുക്കുമെന്നും ഇ.ശ്രീധരൻ വ്യക്തമാക്കി.

ശ്രീധരനെ ക്ഷണിക്കാത്തതില്‍ കേരളത്തിലെ ജനങ്ങള്‍ക്ക് വിഷമമുണ്ടെന്ന്​ മാധ്യമ പ്രവര്‍ത്തകര്‍ ചൂണ്ടിക്കാട്ടിയപ്പോള്‍ താൻ പണിയെടുക്കുന്ന ആളാണ്​. തന്നെ ക്ഷണിക്കേണ്ട കാര്യമില്ല, താൻ ഇവിടെ തന്നെയുണ്ടല്ലോയെന്നും അദ്ദേഹം പറഞ്ഞു. സംഭവം വിവാദമാക്കേണ്ട കാര്യമില്ല. ഇനി ക്ഷണിച്ചാല്‍ വേദിയിലുണ്ടാകുമെന്നും അദ്ദേഹം വ്യക്തമാക്കി. ശനിയാഴ്​ച ഉദ്​ഘാടനത്തിനൊരുങ്ങുന്ന മെട്രോയുടെ ഒരുക്കങ്ങൾ വിലയിരുത്തിയ ശേഷം മാധ്യമങ്ങളോട്​ സംസാരിക്കുകയായിരുന്നു അദ്ദേഹം.

മെട്രോയുടെ രണ്ടാംഘട്ട പദ്ധതിക്ക്​ താനും ഡി.എം.ആർ.സിയും ഉണ്ടാകില്ലെന്നും ഇ. ശ്രീധരൻ അറിയിച്ചു. അടുത്ത ഘട്ടം പൂർത്തിയാക്കാൻ കെ.എം.ആർ.എൽ പ്രാപ്​തരാണ്​.കൊച്ചി മെട്രോ സർവീസ്​ നടത്താൻ പൂർണ സജ്ജമായി കഴിഞ്ഞു. ആദ്യഘട്ട മെട്രോ പദ്ധതിയുടെ അഞ്ചു കിലോമീറ്റർ ഇനിയും പൂർത്തീകരിക്കാനുണ്ട്​. ഇത്​ എത്രയും പെട്ടന്ന്​ പൂർത്തിയാക്കുമെന്നും അദ്ദേഹം അറിയിച്ചു.