വീട്​ ആക്രമണത്തിനിടെ അമിട്ട്​ പൊട്ടി ഡി.വൈ.എഫ്​.ഐ പ്രവർത്തകന്‍റെ കൈപ്പത്തി തകർന്നു

കടയ്ക്കല്‍: ബി.ജെ.പി പ്രവർത്തകന്‍റെ വീട്​ ആക്രമിക്കുന്നതിനിടെ കൈയിലിരുന്ന അമിട്ട്​ പൊട്ടി ഡി.വൈ.എഫ്​.ഐ പ്രവർത്തകന്‍റെ കൈപ്പത്തി തകർന്നു. ഡി.വൈ.എഫ്.ഐ ഏരിയ ഭാരവാഹി വിഷ്ണു ലാലിന്‍റെ (29) കൈപ്പത്തിക്കാണ്​ സാരമായി പരിക്കേറ്റതെന്ന്​ പൊലീസ്​ പറഞ്ഞു. ഇയാളെ പോലീസ് കാവലില്‍ തിരുവനന്തപുരം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. കൂടെയുണ്ടായിരുന്ന വിശാഖിനെ കസ്റ്റഡിയിലെടുത്തു.

ആല്‍ത്തറമൂട് വടക്കേവയലില്‍ ചൊവ്വാഴ്ച രാത്രി 10.30നായിരുന്നു സംഭവം. വിഷ്ണുലാലും പ്രവര്‍ത്തകനായ വിശാഖും (23) ബി.ജെ.പി കടയ്ക്കല്‍ പഞ്ചായത്ത് കമ്മിറ്റി വൈസ് പ്രസിഡന്‍റ്​ വടക്കേവയല്‍ സിന്ധുസദനത്തില്‍ രതിരാജന്‍റെ വീട്​ അക്രമിക്കാൻ ബൈക്കിലാണ്​ എത്തിയതെന്ന്​ പൊലീസ്​ പറഞ്ഞു. കല്ലെറിഞ്ഞ്​ വീടിന്‍റെ ജനൽചില്ലുകൾ തകർത്തു. ഇതിനിടെയാണ് കൈവശമുണ്ടായിരുന്ന അമിട്ട് പൊട്ടിത്തെറിച്ച് വിഷ്ണുലാലിന് പരിക്കേറ്റത്. ഉടൻ ബൈക്കില്‍ രക്ഷപ്പെടുകയായിരുന്നു.

സ്‌പെഷ്യല്‍ ബ്രാഞ്ച് ഡിവൈ.എസ്.പി അനില്‍ കുമാര്‍, കടയ്ക്കല്‍ സി.ഐ ഗിരിലാല്‍, എസ്.ഐ സെന്തില്‍കുമാര്‍ എന്നിവരുടെ നേതൃത്വത്തിലുള്ള സംഘവും ഫോറന്‍സിക് വിദഗ്ധരും സ്ഥലത്തെത്തി അന്വേഷണം നടത്തി.