വർക്കലയിലെ അനധികൃത റിസോർട്ട്​ ഡി.വൈ.എഫ്.ഐ അടിച്ചു തകര്‍ത്തു

തിരുവനന്തപുരം: വര്‍ക്കലയില്‍ അനധികൃതമായി നിർമിക്കുന്ന റിസോര്‍ട്ട് ഡി.വൈ.എഫ്.ഐ പ്രവര്‍ത്തകർ അടിച്ചു തകര്‍ത്തു. ബ്ലാക്ക്‌ ബീച്ച് എന്ന റിസോര്‍ട്ടാണ്​ തകര്‍ത്തത്. റിസോർട്ട്​ നിർമാണത്തിന്​ സ്റ്റോപ് മെമ്മോ നല്‍കിയെന്നാണ് നഗരസഭ ഉദ്യോഗസ്ഥര്‍ പറഞ്ഞത്. എന്നാൽ പകലും രാത്രിയും നിര്‍മാണ പ്രവര്‍ത്തനം നടന്നിരുന്നു. 

അനധികൃത നിര്‍മാണവുമായി ബന്ധപ്പെട്ട് ബുധനാഴ്​ച വര്‍ക്കല നഗരസഭാ കൗണ്‍സിലില്‍ ഭരണപക്ഷ-പ്രതിപക്ഷ അംഗങ്ങള്‍ ബഹളം വെച്ചിരുന്നു. കൗണ്‍സിലര്‍മാരെ അക്രമിച്ചെന്ന് ആരോപിച്ച് എല്‍.ഡി.എഫും യു.ഡി.എഫും ഇന്ന് നഗരസഭയില്‍ ഹര്‍ത്താല്‍ ആചരിക്കുകയാണ്. ഇതിനിടയിലാണ് ഡി.വൈ.എഫ്.ഐ പ്രവര്‍ത്തകര്‍ റിസോര്‍ട്ട് അടിച്ചുതകര്‍ത്തത്.