ലഹരിക്കടത്ത്​: സി.പി.എം നേതാവിന്​ ക്രിമിനല്‍ -ക്വട്ടേഷന്‍ സംഘങ്ങളുമായി ബന്ധമെന്ന്​ പൊലീസ്​ റിപ്പോർട്ട്​

ആലപ്പുഴ: ഒരു കോടി രൂപയുടെ ലഹരിക്കടത്ത് കേസില്‍ സി.പി.എം നേതാവ് എ. ഷാനവാസിനെതിരെ പൊലീസ് റിപ്പോര്‍ട്ട്. കരുനാഗപ്പള്ളിയിൽ വെച്ച്​ ഷാനവാസിന്‍റെ ലോറിയിൽ കൊണ്ടുവന്ന നിരോധിത പുകയില ഉൽപന്നങ്ങൾ പിടികൂടിയതിനോടനുബന്ധിച്ചാണ്​ പൊലീസ്​ രഹസ്യാന്വേഷണ റിപ്പോർട്ട്​ ഡി.ജി.പിക്ക്​ കൈമാറിയത്​. പാർട്ടി ഇയാൾക്കെതിരെ അന്വേഷണത്തിന്​ മൂന്നംഗ കമീഷനെ നിയോഗിച്ചിരിക്കെ, കേസിൽ ഷാനവാസിനെ പൊലീസ് പ്രതിയാക്കിയിട്ടില്ല​. സംഭവത്തിലെ ദുരൂഹത കണക്കിലെടുത്ത്​ നഗരസഭ സ്റ്റാൻഡിങ്​ കമ്മിറ്റി ചെയർമാൻ കൂടിയായ ഷാനവാസിനെ പാർട്ടിയിൽനിന്ന്​ സസ്​പെൻഡ്​ ചെയ്യുകയും മുഖ്യപ്രതിയായ ബ്രാഞ്ച്​ കമ്മിറ്റി അംഗം ഇജാസ്​ ഇക്​ബാലിനെ പുറത്താക്കുകയും ചെയ്​തിരുന്നു​.

ഷാനവാസിന് ക്രിമിനല്‍-ക്വട്ടേഷന്‍-ലഹരി സംഘങ്ങളുമായി ബന്ധമുണ്ടെന്നും സാമ്പത്തിക ഇടപാടുകളില്‍ ഇടനിലക്കാരനായി വിഹിതം കൈപ്പറ്റുന്നുവെന്നും റിപ്പോര്‍ട്ടിലുണ്ട്​. സമ്പത്തുണ്ടാക്കുന്നത് രാഷ്ട്രീയ പിന്‍ബലത്തിലെന്നും കണ്ടെത്തലുണ്ട്​. കരുനാഗപ്പള്ളിയില്‍ പിടിയിലായ ലോറി അടക്കം നാലു വാഹനങ്ങളുണ്ടെന്നും ഷാനവാസിന്‍റെ നേതൃത്വത്തിൽ ക്രിമിനൽ ക്വട്ടേഷന്‍ ഇടപാടുകളുണ്ടെന്നും ഇത്തരം സംഘങ്ങളുമായി ഇയാൾക്ക്​ ബന്ധമുണ്ടെന്നും ഇതിൽ ആരോപിക്കുന്നു. ഇയാൾക്ക്​ എ.ടി.എം സ്ഥാപിക്കുന്നതിനും മൊബൈല്‍ ടവര്‍ സ്ഥാപിക്കുന്നതിനും സ്ഥലമേറ്റെടുത്ത്​ കൊടുക്കുന്ന ഇടപാടുമുണ്ട്.

ഷാനവാസിന്‍റെ ബിനാമിയാണ്​ ഇജാസ്. കൊലപാതകം അടക്കം കേസുകളില്‍ പ്രതിയായ കോഴഞ്ചേരി സ്വദേശിയായ ഷാരോണ്‍ എന്ന ഗുണ്ടക്ക്​ 15,000 രൂപ ചെലവില്‍ ഷാനവാസ് വീടെടുത്ത് നല്‍കിയിട്ടുണ്ട്. സാമ്പത്തിക ഇടപാടില്‍ ഇടനില നിന്ന്​ വിഹിതം വാങ്ങി, റിയൽ എസ്റ്റേറ്റ് -ബിനാമി ഇടപാടുകളിൽ മുടക്കുന്നു എന്നതാണ് മറ്റൊരു ആരോപണം. രാഷ്ട്രീയ ബന്ധം ഉപയോഗിച്ചാണ് സമ്പത്ത് ഉണ്ടാക്കുന്നത് എന്നും റിപ്പോര്‍ട്ടില്‍ സൂചിപ്പിക്കുന്നു.

ലോറി തന്‍റേതാണെങ്കിലും വാടകക്ക്​ നൽകിയിരിക്കുകയാണെന്നും ലഹരിക്കടത്തിൽ ബന്ധമില്ലെന്നുമാണ്​ പാർട്ടി ജില്ല സെക്ര​േട്ടറിയറ്റിൽ ഷാനവാസ്​ ന്യായീകരിച്ചത്​. വാടക കരാർ പൂർണമായിരുന്നില്ലെന്നതടക്കം കരാർ എടുത്തതായി പറയുന്ന പി.എസ്​. ജയന്‍റെ വിലാസത്തിലും വ്യത്യാസമുണ്ടായിരുന്നു. എന്നിട്ടും പാർട്ടിയിലെ പ്രബല വിഭാഗത്തിന്‍റെ ഇടപെടലിലാണ്​ മന്ത്രി സജി ചെറിയാൻ പ​​ങ്കെടുത്ത ജില്ല സെക്ര​േട്ടറിയറ്റ്​ യോഗം ഷാനവാസിനെ പുറത്താക്കണമെന്ന ആവശ്യം തള്ളിയത്​. ഷാനവാസിനെതിരെ കേസ്​ എടുക്കുന്നതും ഇതോടെ തുലാസിലായി. അതിനിടെയാണ്​ പൊലീസ്​ റിപ്പോർട്ട്​.