ഡോ. വന്ദന ദാസ്​ കൊലക്കേസ്​: പ്രതി സന്ദീപിന് മാനസികരോഗമില്ലെന്ന്​​ മെഡിക്കൽ റിപ്പോർട്ട്

കൊട്ടാരക്കര: ഡോ. വന്ദന ദാസിനെ കൊലപ്പെടുത്തിയ കേസിലെ പ്രതി സന്ദീപിന് മാനസികരോഗമില്ലെന്ന് വിദഗ്​ധസമിതി തയാറാക്കിയ മെഡിക്കൽ റിപ്പോർട്ട്. സ്ഥിരമായി മദ്യപിക്കുന്നതിനാലുണ്ടാകുന്ന സാമൂഹികവിരുദ്ധ വ്യക്തിത്വവൈകല്യം (ആന്‍റി സോഷ്യൽ പഴ്സനാലിറ്റി ഡിസോർഡർ) മാത്രമാണ്​ ഇയാൾക്കുള്ളത്. ഇത്​ രോഗമല്ലെന്ന്​ കേസ്​ അന്വേഷിക്കുന്ന ക്രൈംബ്രാഞ്ച്​ ഡിവൈ.എസ്​.പി എം.എം. ജോസ്​ പറഞ്ഞു.

തിരുവനന്തപുരം മെഡിക്കൽ കോളജ് ആശുപത്രി ആർ.എം.ഒ ഡോ. മോഹൻ റോയിയുടെ നേതൃത്വത്തിൽ 10 ദിവസം സന്ദീപിനെ നിരീക്ഷിച്ചാണ്​ റി​പ്പോർട്ട്​ തയാറാക്കിയത്​. സൈക്യാട്രി, ന്യൂറോ സർജറി, ജനറൽ മെഡിസിൻ തുടങ്ങിയ വകുപ്പുകളുടെ മേധാവിമാരും നിരീക്ഷണ സംഘത്തിലുണ്ടായിരുന്നു.

വീട്ടിലുള്ളവരോട് സന്ദീപ്​ ക്രൂരമായി പെരുമാറിയിരുന്നു. ഇതേ പ്രേരണയാകാം ഡോ. വന്ദനയെ കൊലപ്പെടുത്താനിടയാക്കിയതെന്നും അധികൃതർ സംശയിക്കുന്നു.