ഡോ. എം.ആർ ബൈജു പി.എസ്.സി ചെയർമാൻ

തിരുവനന്തപുരം: കേരള പബ്ലിക് സർവീസ് കമ്മീഷൻ പുതിയ ചെയർമാനായി ഡോ. എം.ആർ ബൈജുവിനെ ശിപാർശ ചെയ്യാൻ മന്ത്രിസഭ തീരുമാനിച്ചു. നിലവിലെ ചെയർമാൻ അഡ്വ. എം.കെ സക്കീർ ഒക്ടോബർ 30 ന് വിരമിക്കുന്ന ഒഴിവിലാണ് പുതിയ നിയമനം.

ഡോ. എം.ആർ ബൈജു നിലവിൽ പി.എസ്.സി അംഗമാണ്. 2017 ജനുവരി ഒമ്പതിനാണ് പി.എസ്.സി അംഗമായി ചുമതലയേറ്റത്. തിരുവനന്തപുരം അമ്പലമുക്ക് സ്വദേശിയാണ്. എം.ടെക്ക് പൂർത്തിയാക്കി എഞ്ചിനീയറിയങ്ങിൽ ഡോക്‌ട‌റേറ്റ് നേടിയിട്ടുണ്ട്.

തിരുവനന്തപുരം ഗവ. എഞ്ചിനീയറിങ്ങ് കോളജിൽ ഇലക്ട്രോണിക്‌സ് ആൻഡ്‌ കമ്മ്യൂണിക്കേഷനിൽ പ്രഫസറായിരിക്കെയാണ് പി.എസ്.സി അംഗമായി നിയമിതനായത്.

ഭാര്യ: മഞ്ജു എസ്ദേവ്. സാഗര, ആരതി കൃഷ്‌ണ എന്നിവർ മക്കളാണ്.