Begin typing your search above and press return to search.
exit_to_app
exit_to_app
Homechevron_rightNewschevron_rightKeralachevron_rightഡോ. മാത്യൂസ് മാർ...

ഡോ. മാത്യൂസ് മാർ സേവേറിയോസ് ഓർത്തഡോക്സ് സഭ പരമാധ്യക്ഷൻ

text_fields
bookmark_border
Dr Mathews Mar Severios
cancel
camera_alt

ഡോ. മാത്യൂസ് മാർ സേവേറിയോസ് 

തിരുവല്ല: മലങ്കര ഓർത്തഡോക്സ് സഭയുടെ പരമാധ്യക്ഷനായി ഡോ. മാത്യൂസ് മാർ സേവേറിയോസിനെ തെരഞ്ഞെടുത്തു. പരുമല സെമിനാരി അങ്കണത്തിൽ ചേർന്ന മലങ്കര അസോസിയേഷൻ യോഗത്തിലായിരുന്നു തെരഞ്ഞെടുപ്പ്. മാർ സേവേറിയോസിനെ പുതിയ കാതോലിക്കാ ബാവായായി സുന്നഹദോസ് നേര​ത്തേ നിർദേശിച്ചിരുന്നതാണ്​. ഇതിന് മലങ്കര അസോസിയേഷൻ ഒൗദ്യോഗിക അംഗീകാരം നൽകുകയായിരുന്നു. അടുത്തദിവസം തന്നെ വാഴിക്കൽ ചടങ്ങ്​ നടക്കും. സഭാധ്യക്ഷന്‍റെ പുതിയ പേര് വാഴിക്കൽ ചടങ്ങിലാണ്​ പ്രഖ്യാപിക്കുക.

പരുമല പള്ളിയിലെ പ്രാർഥനക്കുശേഷം പരിശുദ്ധ ബസേലിയോസ് മാർത്തോമ്മാ പൗലോസ് ദ്വിതീയൻ കാതോലിക്കാ ബാവാ നഗറിലേക്ക് ഘോഷയാത്ര നടത്തി പ്രത്യേകം തയാറാക്കിയ അസോസിയേഷൻ നഗരിയിൽ എല്ലാ പ്രതിനിധികളും പ്രവേശിച്ച് യോഗവും തെരഞ്ഞെടുപ്പും നടത്തുകയായിരുന്നു. തെരഞ്ഞെടുപ്പ് ഫലം അസോസിയേഷൻ പ്രസിഡന്‍റ്​ കുര്യാക്കോസ് മാർ ക്ലിമ്മീസ്​ പ്രഖ്യാപിച്ചു. ഇത്​ അസോസിയേഷൻ അംഗങ്ങൾ കയ്യടിച്ച്​ പാസ്സാക്കുകയും ആചാരവെടി മുഴക്കുകയും ചെയ്തു. തുടർന്ന് ഔദ്യോഗിക വേഷവും സ്ഥാന ചിഹ്നങ്ങളും നൽകി. അഭിഷേക ചടങ്ങുകൾ തീരുമാനിക്കാൻ ഇന്നുതന്നെ സുന്നഹദോസ് ചേരും. നാളെ തന്നെ പരുമലയിൽ സ്​ഥാനാരോഹണ ശുശ്രൂഷകൾ നടക്കുമെന്നാണ്​ വിവരം.

1949 ഫെബ്രുവരി 12നാണ്​ മറ്റത്തിൽ ചെറിയാൻ അന്ത്രയോസിന്‍റെയും പാമ്പാടി വാലേൽ വടക്കേകടുപ്പിൽ മറിയാമ്മയുടെയും മകനായി ഡോ. മാത്യൂസ് മാർ സേവേറിയോസ് ജനിച്ചത്​. സെന്‍റ്​ പീറ്റേഴ്സ് എൽ.പി സ്കൂൾ, സെന്‍റ്​ പോൾസ് ഹൈസ്കൂൾ, വാഴൂർ എസ്.വി.ആർ. എൻ.എസ്.എസ് ഹൈസ്കൂൾ എന്നിവിടങ്ങളിലായിരുന്നു സ്​കൂൾ പഠനം. പ്രീഡിഗ്രി വാഴൂർ എസ്‌.വി. ആർ എൻ.എസ്.എസ് കോളജിലും ഡിഗ്രി (കെമിസ്ട്രി) കോട്ടയം സി.എം.എസ് കോളജിലുമായിരുന്നു.

പിന്നീട്​ ഓർത്തഡോക്സ് വൈദിക സെമിനാരിയിൽ പഠിച്ച് സെറാംപൂർ യൂണിവേഴ്സിറ്റിയിൽനിന്ന് ദൈവശാസ്ത്രത്തിൽ ബിരുദം നേടി. ലെനിൻഗ്രാഡ തിയോളജിക്കൽ അക്കാദമിയിൽ നിന്നാണ്​ പി.ജി ഡിപ്ലോമ ഇൻ സെഞ്ചുറി ബൈസൻറ്റൈൻ ഓർത്തഡോക്സ് തിയോളജി നേടിയത്​. റോമിലെ ഓറിയന്‍റൽ ഇൻസ്റ്റിറ്റ്യൂട്ടിൽ നിന്ന്​ ദൈവശാസ്ത്രത്തിൽ ബിരുദാനന്തര ബിരുദവും മാബൂഗിലെ മാർ പീലക്സിനോസ് പിതാവിന്‍റെ ക്രിസ്തുശാസ്ത്രം വിഷയത്തിൽ പിഎച്ച്​.ഡിയും നേടി.

1978 ജൂൺ 30നാണ്​ വൈദിക പട്ടം നേടുന്നത്​. മേൽപട്ട സ്ഥാന തിരഞ്ഞെടുപ്പ് 1989 ഡിസംബർ 28നും റമ്പാൻ സ്ഥാനം 1990 മാർച്ച് 31നും എപ്പിസ്കോപ്പാ സ്ഥാനാഭിഷേകം 1991 ഏപ്രിൽ 30നും നടന്നു. 1993 സെപ്റ്റംബർ 22നാണ്​ മെത്രാപ്പൊലീത്താ പദവി ലഭിച്ചത്​. 1993 സെപ്റ്റംബർ 26ന് കണ്ടനാട് ഭദ്രാസന മെത്രാപ്പൊലീത്തയും 2002ൽ കണ്ടനാട് വെസ്റ്റ് ഭദ്രാസന മെത്രാപ്പൊലീത്തയുമായി. കോട്ടയം സെൻട്രൽ, കണ്ടനാട്, ഇടുക്കി (രണ്ടു തവണ), മലബാർ ഭദ്രാസനങ്ങളുടെ സഹായ മെത്രാപ്പൊലീത്തായായിരുന്നു. എപ്പിസ്കോപ്പൽ സുന്നഹദോസ് സെക്രട്ടറി സ്ഥാനം രണ്ട്​ തവണ വഹിച്ചിട്ടുണ്ട്.

Show Full Article
TAGS:Dr. Mathews Mar Severios Malankara Orthodox Syrian Church 
News Summary - Dr. Mathews Mar Severios elected as new catholicos for Malankara orthodox syrian church
Next Story