ഡോ. പി.എം. ഫൈറൂസ്; ലോകത്തെ സ്വാധീനിച്ച 100 വനിത നേത്രരോഗ വിദഗ്​ധരുടെ പട്ടികയില്‍ ഇടംപിടിച്ച ഏക മലയാളി

കണ്ണൂർ: ​അനുഭവം സാധ്യമാക്കുന്നത്​ കാഴ്​ചയിലൂടെയാണ്​. അതിനുള്ള ഇ​ന്ദ്രിയമാണ്​ കണ്ണ്​. അതുകൊണ്ടുതന്നെയാണ്​ ഡോ. ഫൈറൂസ്​ വൈദ്യപഠനത്തിന്​ ഒഫ്​താൽമോളജി ​ഇഷ്​ടവിഷയമായി തിരഞ്ഞെടുത്തതും. ലോകത്തെ സ്വാധീനിച്ച 100 വനിത നേത്രരോഗ വിദഗ്​ധരുടെ പട്ടികയില്‍ ഇടംപിടിച്ച ഏക മലയാളിയെന്ന ബഹുമതി നേടിയതോടെ ആ തീരുമാനം തെറ്റായിരുന്നില്ലെന്ന്​ തെളിയിച്ചിരിക്കുകയാണ്​ കണ്ണൂർ സ്വദേശിനിയായ ഡോ. പി.എം. ഫൈറൂസ്​​.

'ദി ഒഫ്​താൽമോളജിസ്​റ്റ്​'എന്ന അമേരിക്കൻ മാസിക പവര്‍ ലിസ്​റ്റെന്ന പേരില്‍ പുറത്തിറക്കിയ പട്ടികയിലാണ് കണ്ണൂർ സ്വദേശിനിയായ​ ഡോ. പി.എം. ഫൈറൂസ്​ ഇടം നേടിയത്​.

അമേരിക്കയിൽനിന്നും പ്രസിദ്ധീകരിക്കുന്ന അന്താരാഷ്​ട്ര പ്രസിദ്ധീകരണമാണ് ഇൗ മാഗസിന്‍. അന്താരാഷ്​ട്ര തലത്തിലെ വിദഗ്​ധ പാനലാണ് അന്തിമ പട്ടികയുണ്ടാക്കുന്നത്. ഈ വര്‍ഷം ആദ്യമായാണ് മാഗസിന്‍ വനിതകളെ മാത്രം ഉള്‍പ്പെടുത്തി ലിസ്​റ്റ്​ പുറത്തിറക്കിയത്.

1200 പേരാണ് ആദ്യ റൗണ്ടിൽ പട്ടികയിലുണ്ടായിരുന്നത്. അതിലെ 300 പേര്‍ രണ്ടാംഘട്ടത്തില്‍ ഉൾപ്പെട്ടു. അതില്‍നിന്നും മികച്ച 100 പേരെയാണ് തിരഞ്ഞെടുത്തത്. ഇതിലൊരാളാണ്,​ കണ്ണൂർ താണ സ്വദേശികളായ കെ.ടി. ഇബ്രാഹിം–പി.എം. ഉമ്മുൽ ഫായിസ ദമ്പതികളുടെ മകളായ​ ഫൈറൂസ്​.

കണ്ണിലെ അർബുദത്തെക്കുറിച്ച് നടത്തിയ പഠനങ്ങളും ഗവേഷണങ്ങളും മുന്‍നിര്‍ത്തിയാണ് ഡോക്​ടർ, പട്ടികയില്‍ ഇടംനേടിയത്. കണ്ണില്‍ അർബുദം ബാധിച്ചവരുടെ ജീവന്‍ രക്ഷിക്കുന്നതിനോടൊപ്പം പരമാവധി കാഴ്ചയും സംരക്ഷിക്കുകയെന്ന ഗവേഷണത്തിനാണ്​ ബഹുമതി. കുട്ടികളുടെ കണ്ണിനെ ബാധിക്കുന്ന 'റെറ്റിനൊ ബ്ലാസ്​റ്റോമ' എന്ന അർബുദത്തെക്കുറിച്ചാണ് പഠനങ്ങള്‍.

ലോകത്ത് പ്രതിവര്‍ഷം 8000 മുതല്‍ 8500 വരെ കുട്ടികള്‍ക്ക് ഈ അർബുദം പിടിപെടുന്നുണ്ടെന്ന് ഫൈറൂസ് ഗവേഷണത്തില്‍ കണ്ടെത്തി. ഇന്ത്യയിലും ചൈനയിലും പ്രതിവര്‍ഷം 2000 കുട്ടികള്‍ക്ക് ഈ അസുഖമുണ്ടാകുന്നു. അസുഖം ബാധിച്ചാല്‍ കണ്ണെടുത്തു കളയുകയെന്നത് മാത്രമായിരുന്നു നേരത്തെയുള്ള എക പോംവഴി.

എന്നാല്‍, പുതിയ ചികിത്സാ സംവിധാനമുപയോഗിച്ച്, രോഗിയുടെ ജീവനും കണ്ണും ഒപ്പം കാഴ്​ചയും ഒരുപോലെ സംരക്ഷിക്കാന്‍ സാധിക്കുമെന്ന ഫൈറൂസി‍െൻറ ആശയത്തിനാണ് ലോകോത്തര അഗീകാരം ലഭിച്ചത്.

ആറുവര്‍ഷമായി ബംഗളൂരുവിലെ ഹോറസ് സ്‌പെഷാലിറ്റി ഐ കെയര്‍ ഡയറക്​ടറായി പ്രവര്‍ത്തിക്കുകയാണ്. ചൈനയിലും ഡോക്​ടറായി സേവനമനുഷ്​ഠിച്ചിരുന്നു.

കരിയറി‍െൻറ തുടക്കത്തില്‍തന്നെ 'ആര്‍ട്ടീരിയല്‍ കീമോ തെറപ്പി'യെന്ന അതിനൂതന ചികിത്സ രീതിയുടെ ഭാഗമാകാന്‍ ഇവർക്ക്​ കഴിഞ്ഞു. ജപ്പാനില്‍ ആരംഭിച്ച് യു.എസില്‍ തരംഗമായ ഈ ചികിത്സ രീതിയുടെ ഗവേഷണത്തിലും പ്രബന്ധാവതരണത്തിലുമെല്ലാം പങ്കാളിയായിട്ടുണ്ട്.

ട്യൂമര്‍ സെല്ലുകളെ ഇഞ്ചക്​ഷന്‍ ഉപയോഗിച്ച് നശിപ്പിച്ചുകളയുന്ന 'ഇൻട്രാവിട്രിയല്‍ കീമോതെറപ്പി'യെന്ന ചികിത്സാരീതിയെക്കുറിച്ചും മറ്റ് അത്യാധുനിക ചികിത്സ രീതികളെക്കുറിച്ചും ഫൈറൂസ് നിരവധി ഗവേഷണ പ്രബന്ധങ്ങള്‍ പ്രസിദ്ധീകരിച്ചിരുന്നു.

തൃശൂര്‍ മെഡിക്കല്‍ കോളജില്‍ നിന്നാണ് എം.ബി.ബി.എസ് പൂര്‍ത്തിയാക്കിയത്. മൈസൂര്‍ മെഡിക്കല്‍ കോളജില്‍നിന്ന്​ പി.ജി പഠനത്തിനുശേഷം ഹൈദരാബാദ് എല്‍.വി പ്രസാദ് ഐ ഇന്‍സ്​റ്റിറ്റ്യൂട്ടില്‍ നിന്ന്​ ഫെലോഷിപ് നേടി. പിന്നീട് യു.എസില്‍നിന്ന് കണ്ണിലെ അർബുദത്തെക്കുറിച്ചുള്ള പഠനത്തില്‍ ഫെലോഷിപ്പും ചെയ്​തു.