വിജയ് മല്യയെയും നീരവ് മോദിയെയും ഉദാഹരിക്കേണ്ട;​ ലഹരിക്കേസ്​ പ്രതിക്ക്​ വിദേശത്ത്​ പോകാൻ അനുമതി

കൊച്ചി: വിദേശത്ത്​ ജോലിക്ക്​ പോകാൻ ജാമ്യ വ്യവസ്ഥയിൽ ഇളവ്​ തേടിയ പ്രതിയുടെ അപേക്ഷ വിജയ് മല്യയെയും നീരവ് മോദിയെയും ഉദാഹരിച്ച്​ നിരസിച്ച സെഷൻസ്​ കോടതി നടപടിയെ വിമർശിച്ച്​ ഹൈകോടതി. 2018ൽ 18 വയസ്സുള്ളപ്പോൾ ലഹരിക്കേസിൽ പ്രതിയായ തൃശൂർ കൂർക്കഞ്ചേരി സ്വദേശി സൂര്യനാരായണൻ സമർപ്പിച്ച അപേക്ഷ നിരസിച്ച ഉത്തരവിലെ പരാമർശം അനുചിതമെന്ന് നിരീക്ഷിച്ച ജസ്​റ്റിസ്​ വി.ജി. അരുൺ, അപേക്ഷ വീണ്ടും പരിഗണിച്ച് തീർപ്പാക്കാനും ഉത്തരവിട്ടു.

പിടിയിലായി ഒരുവർഷത്തിനുശേഷം ജാമ്യം ലഭിച്ചതിനെത്തുടർന്നാണ് വിദേശത്ത്​ പോകാൻ അനുമതിക്കായി ഹരജിക്കാരൻ കോടതിയെ സമീപിച്ചത്​. എന്നാൽ, തട്ടിപ്പ് നടത്തി വിദേശത്തുപോയശേഷം തിരിച്ചെത്താത്ത മല്യയുടെയും നീരവ് മോദിയുടെയും കേസുമായി ഉപമിച്ച്​ അഡീ. സെഷൻസ് കോടതി അനുമതി നിഷേധിക്കുകയായിരുന്നു. ഇതിനെയാണ് ഹൈകോടതി വിർശിച്ചത്.

ജീവനോപാധിയെന്ന നിലയിൽ തൊഴിൽ തേടാനാണ് ഇയാൾ അനുമതി തേടിയത്. വിചാരണ അടുത്തൊന്നും പൂർത്തിയാകാൻ സാധ്യതയില്ലെന്ന്​ അഡീ. സെഷൻസ് കോടതിയിൽ കെട്ടിക്കിടക്കുന്ന കേസുകളെക്കുറിച്ച റിപ്പോർട്ട് പരിശോധിച്ചശേഷം സിംഗിൾ ബെഞ്ച് വിലയിരുത്തി. തുടർന്നാണ് അപേക്ഷ വേഗം പരിഗണിച്ച് അനുമതി നൽകാൻ നിർദേശിച്ചത്.