ഡോക്​ടർമാരുടെ അനാസ്​ഥ: പന്ത്രണ്ടുകാരിക്ക്​ കാലു മാറി ശസ്​ത്രക്രിയ നടത്തി

തിരുവനന്തപുരം: ആറാം ക്ലാസ്​ വിദ്യാർഥിനിക്ക്​ സ്വകാര്യ ആശുപത്രിയിൽ കാലുമാറി ശസ്​ത്രക്രിയ. പട്ടം മുറിഞ്ഞപാലം ജി.ജി ആശുപത്രിയിലാണ് പന്ത്രണ്ടുകാരിയുടെ ഇടതുകാലില്‍ നടത്താനുള്ള ശസ്ത്രക്രിയ വലതുകാലില്‍ നടത്തിയത്. മാലി സ്വദേശി ഹസന്‍ അലിയുടെയും വെട്ടുകാട് ഒാള്‍സെയിൻറ്​സ്​ സ്വദേശി റഷീദയുടെയും മകള്‍ മറിയം ഹംദയാണ്​ ക്രൂരതക്കിരയായത്​. അബദ്ധം പറ്റിയതാണെന്ന് ആശുപത്രി അധികൃതര്‍ സമ്മതിച്ചതായി രക്ഷാകർത്താക്കൾ പറഞ്ഞു.  

മൂന്നുമാസം മുമ്പ്​ കുട്ടിയുടെ ഇടതുകാലിന്​ കസേരയിലിടിച്ച്​ പരിക്കേറ്റിരുന്നു. സ്കൂളിലെ പടിക്കെട്ട്​ കയറാന്‍ വിഷമം അനുഭവപ്പെട്ടത്തിനെതുടർന്നാണ്​ കഴിഞ്ഞയാഴ്ച ജി.ജി ആശുപത്രിയിലെത്തിച്ചത്. ഇടതുകാലി‍​െൻറ എക്സ്റേയും എം.ആര്‍.ഐ സ്കാനും എടുത്ത ഡോക്ടര്‍മാര്‍ ഇടതുകാല്‍മുട്ടിലെ ലിഗ്​മ​െൻറിന് പരിക്കുണ്ടെന്നും ശസ്ത്രക്രിയ വേണമെന്നും നിര്‍ദേശിക്കുകയായിരുന്നു.

തിങ്കളാഴ്ച ഉച്ചക്ക് ശസ്ത്രക്രിയക്കുശേഷം മകളെ കണ്ടപ്പോഴാണ്​ കാലുമാറി ശസ്​ത്രക്രിയ നടത്തിയവിവരം മാതാവ്​ അറിഞ്ഞത്​. ഗുരുതര ചികിത്സാപിഴവ് ചൂണ്ടിക്കാട്ടി രക്ഷാകർത്താക്കള്‍ മെഡിക്കൽ കോളജ്​ പൊലീസിൽ പരാതി നൽകി. ആശുപത്രി അധികൃതര്‍ സംഭവം ഒതുക്കിത്തീര്‍ക്കാനുള്ള  ശ്രമത്തിലാണ്.

ഇടതുകാൽ ശസ്​ത്രക്രിയ ചെയ്യുന്നതുൾപ്പെടെ ചികിത്സകളും തുടര്‍ചികിത്സയും സൗജന്യമായി ചെയ്തുനല്‍കാമെന്ന്‍ ആശുപത്രി മാനേജ്മ​െൻറ്​ രക്ഷാകർത്താക്കളെ അറിയിച്ചിട്ടുണ്ട്.കുട്ടി തീവ്രപരിചരണവിഭാഗത്തിലാണ്. വെട്ടുകാട് മിസ്​റ്റിക്കല്‍ റോസ് സ്കൂൾ വിദ്യാര്‍ഥിനിയാണ്​.ആശുപത്രി അധികൃതരുമായി ബന്ധപ്പെട്ടെങ്കിലും സംഭവത്തെക്കുറിച്ച് പ്രതികരിക്കാന്‍ തയാറായില്ല.