വിമത വൈദികരെ സഭ സ്ഥാപനങ്ങളുടെ താക്കോൽ സ്ഥാപനങ്ങളിൽ നിന്ന് നീക്കം ചെയ്യണം -അൽമായ ശബ്ദം

കൊച്ചി: അൾത്താരഭിമുഖ കുർബാന അർപ്പിക്കാത്ത വൈദികരെ സഭയുടെ വിദ്യാഭ്യാസ സ്ഥാപനങ്ങളുടെയും ഇടവകകളുടെയും ചുമതലകളിൽനിന്ന് മാറ്റിനിർത്തണമെന്ന് അൽമായ ശബ്ദം നേതാക്കൾ ആവശ്യപ്പെട്ടു. അവർ തെറ്റ് ഏറ്റുപറഞ്ഞ്​ തിരുത്തലുകൾക്ക് വിധേയരാകണം. എങ്കിൽ മാത്രം ശിക്ഷകളിൽ ഇളവ് നൽകാവൂ എന്നും അവർ പറഞ്ഞു.

അതിരൂപതയുടെ പ്രസിദ്ധീകരണങ്ങളുടെ പ്രവർത്തനം എകീകൃത കുർബാന അതിരൂപതയിൽ പൂർണമാകുന്നതുവരെ നിർത്തിവെക്കണം. വിശ്വാസികളുടെ ശ്രമഫലമായി ഉടലെടുത്ത വിദ്യാഭ്യാസ സ്ഥാപനങ്ങളുടെ ഭരണ ചുമതല കോർപറേറ്റ് മാനേജ്മെന്റിൽനിന്ന്​ ഇടവകൾക്ക് കൈമാറണം. മാനേജ്മെന്റിലെ കഴിഞ്ഞ അഞ്ചു വർഷത്തെ നിയമനവുമായി ബന്ധപ്പെട്ട് ലഭിച്ച സംഭാവനകളുടെ കണക്ക് പ്രസിദ്ധീകരിക്കണം.

ഈ കാര്യങ്ങൾ പൂർത്തിയാകുന്നതുവരെ കോർപറേറ്റ് മാനേജ്മെന്റിലെ എല്ലാ നിയമനങ്ങളും നിർത്തിവെക്കണമെന്ന് അൽമായ ശബ്ദം ഭാരവാഹികളായ ബിജു നെറ്റിക്കാടൻ, ഷൈബി പാപ്പച്ചൻ എന്നിവർ സഭ നേതൃത്വത്തോട് ആവശ്യപ്പെട്ടു.