എസ്‌.എന്‍.ഡി.പി യോഗം ഡയറക്ടര്‍മാരുടെ അയോഗ്യത; രജിസ്​​ട്രേഷൻ ഐ.ജി​ തീരുമാനിക്കണമെന്ന്​ വീണ്ടും ഹൈകോടതി

കൊച്ചി: വെള്ളാപ്പള്ളി നടേശൻ അടക്കം എസ്‌.എന്‍.ഡി.പി യോഗം ഡയറക്ടര്‍മാർ അയോഗ്യരാണോ എന്ന കാര്യത്തിൽ തീര്‍പ്പ്‌ കല്‍പിക്കാൻ വീണ്ടും രജിസ്​​ട്രേഷൻ ഐ.ജിക്ക്​ ഹൈകോടതി നിർദേശം. വാര്‍ഷിക റിട്ടേണ്‍ സമര്‍പ്പിക്കുന്നതിലെ വീഴ്‌ച ചൂണ്ടിക്കാട്ടി ഡയറക്ടർമാരെ അയോഗ്യരാക്കണമെന്ന്​ ആവശ്യപ്പെട്ട്​ പ്രഫ. എം.കെ. സാനു സമര്‍പ്പിച്ച നിവേദനത്തിൽ മൂന്നുമാസത്തിനകം തീരുമാനമെടുക്കാനുള്ള മുൻ ഉത്തരവ്​ നടപ്പാകാത്ത സാഹചര്യത്തിലാണ്​ ഒന്നരമാസത്തിനകം ഇക്കാര്യത്തിൽ നടപടിക്ക്​ ജസ്റ്റിസ്​ ദേവൻ രാമച​ന്ദ്രൻ നിർദേശം നൽകിയത്​. ഹരജിക്കാരനെയും നടപടിക്ക് സാധ്യതയുള്ള ഡയറക്ടർമാരെയും ഒരു മാസത്തിനകം കേട്ട ശേഷം രണ്ടാഴ്​ചക്കകം തീരുമാനമെടുക്കണം.

2021​ ജനുവരിയിലെ ഡിവിഷൻ ബെഞ്ച്​ ഉത്തരവിൽ രജിസ്​​ട്രേഷൻ ഐ.ജി നടപടിയെടുക്കാതിരിക്കുകയും സിവിൽ കോടതിയെ സമീപിച്ച്​ തീർപ്പാക്കാൻ ഉത്തരവിടുകയും ചെയ്ത സാഹചര്യത്തിൽ എം.കെ. സാനുവടക്കം ഹരജിക്കാർ വീണ്ടും കോടതിയെ സമീപിക്കുകയായിരുന്നു. ഡിവിഷൻ ബെഞ്ചിന്‍റെ നിർദേശപ്രകാരം നിശ്ചിത സമയത്തിനകം ഐ.ജി ചുമതല നിർവഹിച്ചില്ലെന്നും ഇത്​​​ അനുചിതമാണെന്നും ​കോടതി വിമർശിച്ചു. വിഷയം വീണ്ടും രജിസ്​ട്രേഷൻ ​ഐ.ജിക്ക്​ വിടുന്നത്​ സമയം പാഴാക്കാനിടയാക്കുമെന്നായിരുന്നു ഹരജിക്കാരുടെ വാദം. വർഷങ്ങളായി പൊതുയോഗം നടക്കുന്നില്ല. അയോഗ്യരെങ്കിലും ഡയറക്ടർ ബോർഡ്​ അംഗങ്ങളെ സ്ഥാനത്ത്​ തൂങ്ങിക്കിടക്കാൻ ഫലത്തിൽ അനുവദിക്കുകയാണ്​. അവരെ തുടരാൻ അനുവദിക്കുന്നത്​ അനുചിതമാണെന്നും ഹരജിക്കാർ വാദിച്ചു.

ഉത്തരവ്​ പാലിക്കാത്ത ഐ​.ജിയുടെ നടപടി പൊറുക്കാവുന്നതല്ലെന്നും ജുഡീഷ്യൽ സംവിധാനത്തിന്‍റെ വിശ്വാസ്യ​തെയും മതിപ്പിനെയും ബാധിക്കുന്നതുമാണെന്നും​ വിലയിരുത്തിയ ഹൈകോടതി, വിഷയം സിവിൽ കോടതിയിൽ തീർപ്പാക്കാനുള്ള ഐ.ജിയുടെ ഉത്തരവ്​ റദ്ദാക്കി. തുടർന്നാണ്​ ഒന്നര മാസത്തിനകം തീരുമാനമെടുക്കാൻ ഐ.ജിക്ക്​ നിർദേശം നൽകിയത്​.