വധഗൂഢാലോചന കേസ്: സംവിധായകൻ നാദിർഷായെ ക്രൈം ബ്രാഞ്ച് ചോദ്യം ചെയ്തു

കൊച്ചി: അന്വേഷണ ഉദ്യോഗസ്ഥരെ വധിക്കാൻ നടൻ ദിലീപ് ഉൾപ്പെടെയുള്ളവർ ഗൂഢാലോചന നടത്തിയെന്ന കേസിൽ സംവിധായകൻ നാദിർഷയിൽനിന്ന്​ ക്രൈംബ്രാഞ്ച് അന്വേഷണ സംഘം മൊഴിയെടുത്തു. ദിലീപിന്റെ ചാർട്ടേഡ് അക്കൗണ്ടന്റിന്റെ മൊഴിയും രേഖപ്പെടുത്തി. ദിലീപിന്റെ സാമ്പത്തിക ഇടപാടുകളുമായി ബന്ധപ്പെട്ട കാര്യങ്ങളാണ് ഇയാളിൽനിന്ന്​ ചോദിച്ചറിഞ്ഞത്​.

നാദിർഷയിൽനിന്ന്​ മൊഴിയെടുപ്പ്​ മൂന്നു മണിക്കൂറിലേറെ നീണ്ടു. ചോദ്യംചെയ്യലിന്​ ഹാജരാകാൻ രണ്ടാഴ്ചക്ക്​ മുമ്പ്​ നാദിർഷയോട് ആവശ്യപ്പെട്ടിരുന്നു. വിദേശത്താണെന്ന് അറിയിച്ചതിനെ തുടർന്ന്, മടങ്ങിയെത്തിയ ശേഷം ചോദ്യം ചെയ്യലിന്​ ഹാജരാകുകയായിരുന്നു. ദിലീപുമായി സൗഹൃദവും സിനിമ, സാമ്പത്തിക ഇടപാടുകളും ഉണ്ടെന്നത് ഒഴിച്ചാൽ മറ്റ് ഇടപെടലുകളുമായി ബന്ധമില്ലെന്നാണ് നാദിർഷയുടെ മൊഴി എന്നറിയുന്നു.

ഗൂഢാലോചനക്കേസിൽ ചോദ്യം ചെയ്യാനുള്ളവരുടെ പട്ടിക നേരത്തേ തയാറാക്കിയിരുന്നു. ഈ പട്ടികയിലുള്ളവരുടെ ചോദ്യം ചെയ്യലാണ് നടന്നതെന്നാണ് അന്വേഷണ സംഘം നൽകുന്ന വിവരം. ദിലീപിന്റെ സഹോദരന്‍ അനൂപിനെ ചോദ്യം ചെയ്യാനും നോട്ടീസ് നൽകിയിട്ടുണ്ട്​. തിങ്കളാഴ്ച കളമശ്ശേരിയിലെ ക്രൈംബ്രാഞ്ച് ഓഫിസിൽ നേരിട്ട്​ ഹാജരാകാനാണ് ആവശ്യപ്പെട്ടത്. അനൂപിന്റെ ഫോണ്‍ പരിശോധനഫലം ലഭിച്ചശേഷമാണ് നടപടി. ദിലീപ്, സഹോദരീ ഭർത്താവ് ടി.എൻ. സുരാജ് എന്നിവരുടെ ഫോൺ വിവരങ്ങൾ സൈബർ, ഫൊറൻസിക് പരിശോധനകൾക്കുശേഷം ഉടൻ ലഭിക്കുമെന്നും അന്വേഷണ സംഘം പറഞ്ഞു.