ദിലീപിന്‍റെ ഫോണിലെ തെളിവുകള്‍ നശിപ്പിച്ച സംഭവം; സൈബർ വിദഗ്ധൻ സായ്​ ശങ്കറിന്‍റെ ഭാര്യയെ ചോദ്യംചെയ്തു

കോഴിക്കോട്​: നടിയെ ആക്രമിച്ച കേസിന്‍റെ അന്വേഷണ ഉദ്യോഗസ്ഥരെ വധിക്കാൻ നടൻ ദിലീപ്‌ ഗൂഢാലോചന നടത്തിയെന്ന കേസിൽ സൈബർ വിദഗ്ധൻ സായ്​ ശങ്കറിന്‍റെ ഭാര്യയെ ക്രൈംബ്രാഞ്ച്‌ ചോദ്യം ചെയ്തു. ശനിയാഴ്ച വൈകീട്ടോടെ സി.ഐ ഷമീറിന്‍റെ നേതൃത്വത്തിൽ ഉദ്യോഗസ്ഥർ കോഴിക്കോട്ടെ ഫ്ലാറ്റിലെത്തിയാണ്​ ഇസ സബ്രീന സിറിലിനെ ചോദ്യം ചെയ്തത്​. സായ്​ ശങ്കർ എവിടെയാ​ണെന്ന്​ അറിയില്ലെന്നും 10 ദിവസമായി ക​ണ്ടിട്ടെന്നുമാണ്​ ഇവർ ഉദ്യോഗസ്ഥരെ അറിയിച്ചത്​.

കഴിഞ്ഞ ദിവസം കാരപ്പറമ്പിലെ വീട്ടിലും സായ് ശങ്കറിന്‍റെ ഭാര്യയുടെ വസ്ത്രവ്യാപാര സ്ഥാപനത്തിലും ഭാര്യാപിതാവിന്‍റെ ഫ്ലാറ്റിലും പരിശോധന നടത്തിയിരുന്നു. ഇതിൽ വീട്ടിൽനിന്ന് ഐ പാഡും രണ്ട്‌ മൊബൈൽ ഫോണും അന്വേഷണ സംഘം കസ്റ്റഡിയിലെടുക്കുകയും ചെയ്തു. ഐ പാഡും മൊബൈൽ ഫോണുകളും വിദഗ്ധ പരിശോധനക്കയക്കും.

നേരത്തേ ചോദ്യംചെയ്യലിന്​ ഹാജരാകാൻ ക്രൈംബ്രാഞ്ച്​ സായി ശങ്കറിന്​ നോട്ടീസ്​ നൽകിയിരുന്നു​വെങ്കിലും കോവിഡിന്‍റെ ലക്ഷണങ്ങളുണ്ടെന്നും ചോദ്യംചെയ്യലിന്​ 10 ദിവസത്തെ സാവകാശം വേണമെന്നുമാണ്​ ഇയാൾ അറിയിച്ചത്​. എന്നാൽ, കോവിഡ്​ പരിശോധനഫലമൊന്നും സായി ഹാജരാക്കിയിട്ടില്ലെന്നാണ്​ ഉദ്യോഗസ്ഥർ പറയുന്നത്​. ഇസ സബ്രീനയുടെ ഫോണിൽനിന്ന് ദിലീപിന്‍റെ അഭിഭാഷകന്‍റെ ഫോണിലേക്ക്​ സന്ദേശങ്ങൾ പോയതായി അന്വേഷണസംഘത്തിന്​ വ്യക്തമായിട്ടുണ്ട്.

ദിലീപിന്‍റെ അഭിഭാഷകനായ രാമൻപിള്ളയുടെ ഓഫിസിലെ വൈഫൈ ഉപയോഗിച്ച് ദിലീപിന്‍റെ ഫോണിലെ വിവരങ്ങൾ സായി ശങ്കർ ലാപ്ടോപ്പിലേക്ക് മാറ്റിയതായാണ് വിവരം. ദിലീപ് കോടതിയിൽ ഹാജരാക്കാത്ത മൊബൈൽ ഫോണിലെ വിവരങ്ങളും സായ് ശങ്കറിന്‍റെ പക്കലുണ്ടെന്നാണ്​ ക്രൈംബ്രാഞ്ച് സംശയിക്കുന്നത്​. ഇയാളെ ചോദ്യംചെയ്താൽ മാത്ര​മേ ഇക്കാര്യങ്ങളിൽ വ്യക്തത വരൂ.