പൊരുത്തമറിഞ്ഞ്,  മംഗല്യത്തിലേക്കൊരു ചുവടുവെപ്പ്

കോഴിക്കോട്: മാംഗല്യമെന്നത് ഇന്നലെ വരെ അവർക്ക് സ്വപ്നം മാത്രമായിരുന്നു, ഇന്ന് ആ സ്വപ്നങ്ങൾക്കപ്പുറം പ്രതീക്ഷയുടെ പുതുസൂര്യൻ ഉദിച്ചുയർന്നിട്ടുണ്ട്. തങ്ങൾക്കായി ആരൊക്കെയോ എവിടെയൊക്കെയോ കാത്തിരിക്കുന്നുണ്ടെന്ന വിശ്വാസമുണ്ട്. ആ വിശ്വാസത്തിൻമേലാണ് ഇനിയുള്ള ദിവസങ്ങളിൽ അവരുടെ ചുവടുവെപ്പുകൾ. അംഗപരിമിതരും ഭിന്നശേഷിക്കാരുമായ അവരുടെ സ്വപ്ന‍ങ്ങൾക്ക് പ്രതീക്ഷയുടെ കരുത്തുപകർന്നത് പൊരുത്തം 2018 എന്ന പേരിൽ ജെ.ഡി.ടി ഇസ്​ലാം കാമ്പസിൽ നടന്ന ഭിന്നശേഷി വിവാഹ ആലോചന സംഗമമായിരുന്നു.

എബിലിറ്റി ഫൗണ്ടേഷൻ ഫോർ ഡിസേബിൾഡും വേ ടൂ നിക്കാഹ് ഡോട്ട്കോമും ഫോക്കസ്​ ഇന്ത്യയും ചേർന്ന് ഒരുക്കിയ സംഗമത്തിൽ ആയിരത്തോളം പേർ അവരുടെ മനസ്സുതുറന്നു. താൽപര്യമുള്ളവരോട് തങ്ങളുെട വിവാഹ സങ്കൽപങ്ങൾ  പങ്കുവെച്ചു. വ്യത്യസ്​ത ഭിന്നശേഷികളുള്ള  ചെറുപ്പക്കാർ അവർക്കനുയോജ്യരായ ഇണകളെ കാണുകയും തെരഞ്ഞെടുക്കുകയും ചെയ്ത അപൂർവ സംഗമമാണ് പൊരുത്തമെന്ന പേരിൽ നടന്നത്.  

വേ ടു നിക്കാഹ് വെബ്സൈറ്റിൽ നേരത്തേ രജിസ്​റ്റർ ചെയ്തവരാണ് സംഗമത്തിൽ പങ്കെടുത്തത്. ഇവർക്ക് പരസ്പരം കാണാനും സംസാരിക്കാനും മുപ്പതോളം ക്ലാസ്​മുറികളും അറുപത് കൗണ്ടറുകളുമാണ് ഒരുക്കിയത്. കാഴ്ചയും കേൾവിയുമില്ലാത്തവരെയും പൂർണമായ ചലനശേഷിയുമില്ലാത്തവരെയും സഹായിക്കാൻ മുന്നൂറോളം വളൻറിയർമാരുണ്ടായിരുന്നു. മുന്നൂറോളം ഭിന്നശേഷിക്കാർ പങ്കെടുത്ത അമേരിക്കയിൽ നടന്ന പരിപാടിയാണ് ഇതിനുമുമ്പ്​ ഇത്തരത്തിൽ ഇണകളെ കണ്ടെത്തുന്ന ഏറ്റവും വലിയ വേദിയായി അംഗീകരിക്കപ്പെട്ടിട്ടുള്ളത്.  

ഐ.എസ്​.എമ്മി​​െൻറ 50ാം വാർഷികാഘോഷത്തി​​െൻറ സംഗമം ഒരുക്കിയത്. കേരള ജംഇയ്യതുൽ ഉലമ വർക്കിങ് പ്രസിഡൻറ് സി.പി. ഉമർ സുല്ലമി പരിപാടി ഉദ്ഘാടനം ചെയ്തു. എബിലിറ്റി ഫൗണ്ടേഷൻ ചെയർമാൻ കെ. അഹമ്മദ് കുട്ടി അധ്യക്ഷതവഹിച്ചു. ഫൗണ്ടേഷൻ സെക്രട്ടറി മുസ്​തഫ മദനി, ഫോക്കസ്​ ഇന്ത്യ ചെയർമാൻ പ്രഫ.യു.പി യഹ്​യ ഖാൻ മദനി, ജന. സെക്രട്ടറി ശുക്കൂർ കോണിക്കൽ, കെ.എൻ.എം സെക്രട്ടറി അബ്്ദുറഹിമാൻ മദനി പാലത്ത്, ഐ.എസ്.എം ജന.സെക്രട്ടറി ഡോ. ജാബിർ അമാനി, ട്രഷറർ ഫൈസൽ നന്മണ്ട, വൈസ്​ പ്രസി. പ്രഫ. ഇസ്​മാഈൽ കരിയാട്, ജെ.ഡി.ടി സെക്രട്ടറി സി.പി. കുഞ്ഞുമുഹമ്മദ്, കെ.പി. ഹംസ ജൈസൽ, എൻ.എം. അബ്​ദുൽ ജലീൽ, എം.കെ. അബ്്ദുറസാഖ്, ഡോ. അബ്്ദുൽ അഹദ്മദനി, പി. അബ്്ദുനാസർ,  ഡോ. പി.സി. അൻവർ, അബ്​ദുൽ ജലീൽ പരപ്പനങ്ങാടി, ടി.പി. തസ്​ലിം, കെ.എ. ശിഹാബ് എന്നിവർ പ്രസംഗിച്ചു. മൂന്നു ഘട്ടങ്ങളിലായി നടക്കുന്ന ആലോചന സംഗമത്തി​​െൻറ ആദ്യപരിപാടിയായി മുസ്​ലിം വിഭാഗത്തിൽനിന്നുള്ളവരുടെ സംഗമമാണ് ഞായറാഴ്ച നടന്നത്.  ഏപ്രിൽ അഞ്ച്, പത്ത് തീയതികളിൽ നടക്കുന്ന അടുത്ത ഘട്ടത്തിൽ ഹൈന്ദവ^​െക്രെസ്​തവ വിവാഹാലോചനക്ക് വേദിയൊരുങ്ങും.