ഡീസൽ വില വർധന: കെ.എസ്​.ആർ.ടി.സി ഹൈകോടതിയിൽ ഹരജി നൽകി

തിരുവനന്തപുരം: പൊതുമേഖല എണ്ണക്കമ്പനികളിൽനിന്ന്​ ബൾക്ക് പർച്ചേസ് വിഭാ​ഗത്തിൽ ഇന്ധനം വാങ്ങുന്ന കെ.എസ്.ആർ.ടി.സിക്കുള്ള വില കുത്തനെ വർധിപ്പിച്ചതിനെതിരെ ഹൈകോടതിയിൽ ഹരജി സമർപ്പിച്ചതായി സി.എം.ഡി ബിജുപ്രഭാകർ വാർത്തക്കുറിപ്പിൽ അറിയിച്ചു.

ലാഭകരമല്ലാത്ത റൂട്ടിൽ പോലും പൊതുജനങ്ങൾക്ക് യാത്രാ സൗകര്യമൊരുക്കാൻ സേവനം നടത്തുന്ന കെ.എസ്​.ആർ.ടി.സിക്ക്​, സ്വകാര്യ വാഹനങ്ങൾക്ക് നൽകുന്നതിന്‍റെ ഇരട്ടി നിരക്കിൽ ഇന്ധനം നൽകുന്നത് നീതീകരിക്കാനാകില്ലെന്ന്​ ഹരജിയിൽ പറയുന്നു.

സ്വകാര്യ ബസുടമകൾ കേരളത്തിലെ ഏതെങ്കിലും ഇന്ധന പമ്പിൽനിന്ന്​ 93.47 രൂപക്ക്​ ഒരു ലിറ്റർ ഡീസൽ വാങ്ങുമ്പോൾ കെ.എസ്​.ആർ.ടി.സി 121.36 രൂപ നൽകണം. വിപണി വിലയെക്കാൾ 27.88 രൂപയുടെ വ്യത്യാസത്തിലാണ് എണ്ണക്കമ്പനികൾ ഡീസൽ നൽകുന്നത്. ഇത് തുല്യനീതിക്ക് യോജിക്കാത്തതാണെന്നും ഹരജിയിൽ പറഞ്ഞു.