മത്സ്യബന്ധന വിവാദം: സത്യമെന്ത്​ ​?

അ​മേരിക്കൻ കമ്പനിക്ക്​ കേരളതീരത്ത്​ ആഴക്കടൽ മത്സ്യബന്ധന മേഖലയിൽ സർക്കാർ പ്രവർത്തനാനുമതി നൽകിയെന്ന പ്രതിപക്ഷനേതാവിന്‍റെ ആരോപണം ഫിഷറീസ്​ വകുപ്പ്​ മന്ത്രി മേഴ്​സിക്കുട്ടിയമ്മ നിഷേധിച്ചതോടെ ആശയക്കുഴപ്പങ്ങൾ നിറയുകയാണ്​. 5000 കോടി രൂപയുടെ പദ്ധതിക്ക്​ മേഴ്​സിക്കുട്ടിയമ്മ ന്യൂയോർക്കിൽ വെച്ച്​ ചർച്ച നടത്തുകയും കഴിഞ്ഞയാഴ്ച സർക്കാർ അനുമതി നൽകുകയും ചെയ്​തുവെന്നായിരുന്നു പ്രതിപക്ഷ നേതാവ്​ രമേശ്​ ചെന്നിത്തല വാർത്താ സമ്മേളനത്തിൽ ആരോപിച്ചത്​. എന്നാൽ, പ്രതിപക്ഷ നേതാവിന്‍റെ ആരോപണം അംബന്ധമാണെന്നും ഫിഷറീസ്​ വകുപ്പിന്​ ഇത്​ സംബന്ധിച്ച്​ യാതൊന്നും അറിയില്ലെന്നുമായിരുന്നു മേഴ്​സിക്കുട്ടിയമ്മ മാധ്യമങ്ങളോട്​ പ്രതികരിച്ചത്​.

അമേരിക്കൻ കമ്പനിയായ ഇ.എം.സി.സി വ്യവസായ വകുപ്പ്​ മന്ത്രി ഇ.പി ജയരാജന്​ നൽകിയ ഒരു കത്താണ്​ ആരോപണങ്ങൾക്ക്​ തെളിവായി പ്രതിപക്ഷ നേതാവ്​ പുറത്തുവിട്ടത്​. പദ്ധതി നടപ്പാക്കുന്നതിന്​ കാബിനറ്റിന്‍റെ അനുമതിക്കും ലൈസൻസുകൾ അനുവദിക്കുന്നതിനുമായി ഈ മാസം പതിനൊന്നിന്​ മന്ത്രിക്ക്​ കമ്പനി നൽകിയ കത്താണ്​ രമേശ്​ ചെന്നിത്തല പുറത്തുവിട്ടത്​.

കത്തിലെ വിശദാംശങ്ങൾ

• പദ്ധതി നടപ്പാക്കുന്നതുമായി ബന്ധപ്പെട്ട്​ കാബിനറ്റിന്‍റെ അനുമതിക്കും നടപടിക്രമങ്ങൾ ലഘൂകരിച്ച്​ ലൈസൻസുകൾ അതിവേഗം അനുവദിക്കുന്നതിനുമായി വ്യവസായ വകുപ്പ്​ മന്ത്രി ഇ.പി ജയരാജന്​ ഇ.എം.സി.സി കമ്പനി നൽകിയ കത്തിൽ പദ്ധതിയുമായി ബന്ധപ്പെട്ട്​ സർക്കാറിനും കമ്പനിക്കും ഇടയിലുണ്ടായ നടപടികൾ വിശദീകരിക്കുന്നുണ്ട്​.
• 2018 എ​പ്രിലിൽ ന്യൂയോർക്കിൽ ​വെച്ച്​ മേഴ്​സിക്കുട്ടിയമ്മയുമായി കമ്പനി പ്രതിനിധികൾ ചർച്ച നടത്തിയിരുന്നെന്ന് കത്തിൽ വിശദീകരിക്കുന്നു​.​ ചർച്ചയിൽ മേഴ്​സിക്കുട്ടിയമ്മ അനുകൂലമായി പ്രതികരിക്കുകയും കേരളത്തിൽ നിക്ഷേപം നടത്തുന്നതിന്​ കമ്പനിയെ താൽപര്യത്തോടെ ക്ഷണിക്കുകയും ചെയ്​തിരുന്നു. ആഴക്കടൽ മത്സ്യബന്ധന മേഖലയിൽ നിക്ഷേപം നടത്തുന്നതിനാണ്​ മന്ത്രി കമ്പനിയെ ക്ഷണിച്ചത്​.
  
• തുടർന്ന്​ ഫിഷറീസ്​ വകുപ്പ്​ പ്രിൻസിപ്പൽ സെക്രട്ടറി ജ്യോതിലാലുമായി 2019 ജൂലൈയിൽ കമ്പനി പ്രതിനിധികൾ ചർച്ച നടത്തിയിരുന്നു.
  
• 2019 ആഗസ്റ്റിൽ ഫിഷറീസ്​ വകുപ്പ്​ പ്രിൻസിപ്പൽ സെക്രട്ടറിക്ക്​ പദ്ധതി വിശദാംശങ്ങൾ സമർപ്പിച്ചിരുന്നു.
• ആഗോള നിക്ഷേപക സംഗമം 'അസന്‍റ്​ 2020' ൽ കേരള സർക്കാറുമായി ഇ.എം.സി.സി കമ്പനി ധാരണാ പത്രം ഒപ്പുവെച്ചിരുന്നു. ആഴക്കടൽ മത്സ്യബന്ധന മേഖലയിൽ ഇ.എം.സി.സി കമ്പനി 5000 കോടി നിക്ഷേപിക്കാനുള്ള ധാരണാപത്രമാണ്​ 2020 ഫെബ്രുവരി 28 ന്​ സർക്കാറുമായി കമ്പനി ഒപ്പുവെച്ചത്​.
  
• പള്ളിപ്പുറത്തെ കെ.സ്​.ഐ.ഡി.സി മെഗാ ഫുഡ്​ പാർക്കിൽ മത്സ്യം സംസ്​കരിക്കുന്നതിന്​ കമ്പനിക്കായി സ്​ഥലം അനുവദിക്കാൻ 2020 ഒക്​ടോബർ 30 ന്​ കമ്പനി അപേക്ഷ നൽകിയിട്ടുണ്ട്​. കമ്പനിക്ക്​ നാല്​ ഏക്കർ സ്​ഥലം അനുവദിക്കാൻ 2021 ഫെബ്രുവരി മൂന്നിന്​ കെ.സ്​.ഐ.ഡി.സി കത്ത്​ നൽകിയിരുന്നു.
  
• 2021 ഫെബ്രുവരി രണ്ടിന്​ ഇ.എം.സി.സിയുമായി കേരള ഷിപ്പിങ്​ ആൻഡ്​ ഇൻലാൻഡ്​ നാവിഗേഷൻ കോർപറേഷൻ ലിമിറ്റഡും ധാരണാപത്രം ഒപ്പുവെച്ചിട്ടുണ്ട്​.
  
• 2021 ഫെബ്രുവരി ആറിന്​ പദ്ധതിയുടെ കൾസൾട്ടൻസി സേവനങ്ങൾക്കായി വിർഗോ അക്വ എഞ്ചിനീയറിങുമായും ധാരണാപത്രം ഒപ്പുവെച്ചിട്ടുണ്ട്​.