ഭവനപദ്ധതിയിൽ ഉള്‍പ്പെടുത്തിയില്ല; യുവാവ് തൂങ്ങിമരിച്ച നിലയില്‍

കോട്ടക്കല്‍: വീട് നിർമാണത്തിന് അപേക്ഷിച്ചിട്ടും പഞ്ചായത്ത്​ അധികൃതർ അനുകൂല നടപടിയെടുക്കാത്തതി​ൽ പ്രതിഷേധിച്ച്​ കുത്തിയിരിപ്പുസമരം നടത്തിയ യുവാവിനെ തൂങ്ങിമരിച്ച നിലയില്‍ കണ്ടെത്തി. കോഴിച്ചെന കണ്ടന്‍ചിനയില്‍ താമസക്കാരനായ മുരളീധരനെയാണ്​ (30) തിങ്കളാഴ്ച ഉച്ചക്ക്​ സമീപത്തെ മൈതാനത്തിലെ മരത്തില്‍ തൂങ്ങിമരിച്ച നിലയില്‍ കണ്ടെത്തിയത്. 

മുരളീധരൻെറ കുടുംബം

 

തെന്നല ഗ്രാമപഞ്ചായത്തിലെ കണ്ടന്‍ചിനക്കടുത്ത പീടികത്തിണ്ണയിലാണ് തമിഴ്‌നാട് സ്വദേശിയായ മുരളീധരനും കുടുംബവും താമസിക്കുന്നത്. ഏതെങ്കിലും ഭവനനിര്‍മാണ പദ്ധതികളില്‍ ഉള്‍പ്പെടുത്തി വീടുതരണമെന്ന ആവശ്യവുമായി മുരളീധരന്‍ പലതവണ പഞ്ചായത്ത്​ അധികൃതരെ സമീപിച്ചിരുന്നതായി നാട്ടുകാർ പറഞ്ഞു. അനുകൂല നിലപാടുകളൊന്നും ലഭിക്കാത്തതിനാല്‍ നിരാശനായിരുന്നു. ദിവസങ്ങള്‍ക്കുമുമ്പാണ്​​ കുടുംബത്തോടൊപ്പം മുരളീധരന്‍ പഞ്ചായത്ത് ഓഫിസിനുമുന്നില്‍ കുത്തിയിരിപ്പുസമരം നടത്തിയിരുന്നത്​. 

കഴിഞ്ഞ ദിവസം മുരളീധരന്‍ ചെയ്ത സമരം ​


അതേസമയം, തിങ്കളാഴ്ച മരിക്കുന്നതിനുമുമ്പ് മുരളീധരന്‍ മദ്യപിച്ചിരുന്നതായും ഭാര്യയുമായി വഴക്കിട്ടിരുന്നതായും പൊലീസ് പറഞ്ഞു. അമ്പതുവര്‍ഷം മുമ്പ് തെന്നലയിലെത്തിയതാണ് മുരളീധര​​​​​െൻറ കുടുംബം. മുത്തുലക്ഷ്മിയാണ് ഭാര്യ. നാലുമക്കളുണ്ട്. മൃതദേഹം പോസ്​റ്റു​മോര്‍ട്ടത്തിനായി തിരൂരങ്ങാടി താലൂക്ക്​ ആശുപത്രിയിലേക്ക് മാറ്റി. ചൊവ്വാഴ്ച സംസ്‌കരിക്കും. കോട്ടക്കല്‍ അഡീഷനല്‍ എസ്.ഐ കെ. അജിത്പ്രസാദ് മൃതദേഹ പരിശോധന നടത്തി.