പ്ലസ് വൺ പ്രവേശന നിഷേധം: യോജിച്ച പ്രക്ഷോഭത്തിന് മെക്ക

തിരുവനന്തപുരം: മലബാർ മേഖലയിലെ ആറു ജില്ലകളിലെ ഹയർ സെക്കണ്ടറി പഠനത്തിനുള്ള സീറ്റുകളുടെ കുറവ് പരിഹരിക്കുവാൻ പുതിയ ബാച്ചുകൾ ഉടൻ അനുവദിക്കണമെന്ന് മെക്ക സംസ്ഥാന എക്സിക്യുട്ടീവ് യോഗം ആവശ്യപ്പെട്ടു.ഇതിനായി ശക്തമായ പ്രക്ഷോഭ പരിപാടികൾ ഇതരസംഘടനകളുമായി സഹകരിച്ചും യോജിച്ചും നടത്തുന്നതിനും മെക്ക യോഗം തീരുമാനിച്ചു.

പാലക്കാട് , മലപ്പുറം, കോഴിക്കോട്, വയനാട്, കണ്ണൂർ, കാസർഗോഡ് ജില്ലകളിൽ മുഴുവൻ എ പ്ലസ് ലഭിച്ച കുട്ടികൾക്ക് പോലും പ്രവേശനം ലഭിച്ചിട്ടില്ല. നാൽപതിനായിരം സീറ്റുകളുടെ കുറവ് പരിഹരിക്കുവാൻ നിലവിൽ ഹയർ സെക്കണ്ടറിയുള്ള സ്ഥാപനങ്ങളിൽ അധികബാച്ചുകൾ അനുവദിച്ചും നിലവിലുള്ള ഹൈ സ്കൂളുകൾ അപ്ഗ്രേഡ് ചെയ്തും ഈ അധ്യയന വർഷം തന്നെ പ്രവേശനം സാധ്യമാക്കണം.

രണ്ടാം ഘട്ട അലോട്ട്മെന്റും മാനേജ്മെന്‍റ്​, കമ്മ്യൂണിറ്റി ക്വാട്ട കൾ പൂർണമായും നികത്തിയാലും കാൽ ലക്ഷത്തിനു മേൽ കുട്ടികൾ മലബാറിൽ നിന്നും സീറ്റ് നിഷേധത്തിനരയാകും. സർക്കാർ എയ്ഡഡ് ഭേദമന്യെ മുഴുവൻ ഹയർ സെക്കണ്ടറികളിലും പുതിയ ബാച്ച് അനുവദിക്കണം. സംസ്ഥാനത്ത് മുന്നോക്ക പിന്നാക്ക ഭേദമന്യേ മുഴുവൻ വിഭാഗങ്ങളുടേയും സാമൂഹ്യ-സാമ്പത്തിക- വിദ്യാഭ്യാസ-ജാതി സർവ്വേ സമ്പൂർണമായും നടത്തണമെന്നും മെക്ക ആവശ്യപ്പെട്ടു.

പ്രസിഡന്‍റ്​ പ്രൊഫ: ഇ.അബ്ദുൽ റഷീദ് അധ്യക്ഷത വഹിച്ചു. ജനറൽ സെക്രട്ടറി എൻ.കെ. അലി, എം.എ ലത്തീഫ്, കെ.എം അബ്ദുൽ കരീം, ഡോ.പി. നസീർ, എ.എസ് എ റസാഖ്, സി.എച്ച് ഹംസ മാസ്റ്റർ, ടി എസ് അസീസ്, എ. മഹ്മൂദ്, അബ്ദുൽ സലാം ക്ലാപ്പന , എം. അഖ് നിസ്, എ.ഐ മുബീൻ , സി.ടി കുഞ്ഞയമു , എം.എം നൂറുദ്ദീൻ, പി.അബൂബക്കർ, പി.എം.എ ജബ്ബാർ സി.എം എ ഗഫൂർ , കെ. സ്രാജ് കുട്ടി, എം.എം സലീം , നസീബുള്ള , കെ.എസ് കുഞ്ഞ്, എം. കമാലുദീൻ, പി.എസ് അഷറഫ്, കെ. റഫീഖ്, വി.കെ. അലി, വി.പി സക്കീർ, പി.എസ് ഷംസുദ്ദീൻ, സി. ഷെരീഫ്,കെ.എം സലിം, യൂനസ് കൊച്ചങ്ങാടി , പി.പി എം നാഷാദ്, എം. ഇസ്മയിൽ തുടങ്ങിയവർ ചർച്ചകളിൽ പങ്കെടുത്തു.