ന്യൂനപക്ഷ ക്ഷേമ പദ്ധതികളിലെ 80:20 അനുപാതം റദ്ദാക്കിയ വിധി; ഫ്രറ്റേണിറ്റി റിവ്യു പെറ്റീഷൻ ഫയൽ ചെയ്​തു

കൊച്ചി : ന്യൂനപക്ഷ ക്ഷേമ പദ്ധതികളിലെ 80:20 അനുപാതം റദ്ദാക്കിയ കേരള ഹൈക്കോടതി വിധിക്കെതിരെ ഫ്രറ്റേണിറ്റി മൂവ്‌മെന്‍റ്​ റിവ്യൂ പെറ്റീഷൻ ഫയൽ ചെയ്തു. ഫ്രറ്റേണിറ്റി മൂവ്മെന്‍റ്​ സംസ്ഥാന ജനറൽ സെക്രട്ടറി കെ കെ അഷ്റഫ് ആണ് അഡ്വ: മുഹമ്മദ് ഇഖ്ബാൽ മുഖേന ഹൈക്കോടതിൽ റിവ്യൂ പെറ്റീഷൻ ഫയൽ ചെയ്തത്.

കേസുമായി ബന്ധപ്പെട്ട വാദം നടക്കുമ്പോൾ വസ്തുതകൾ ഹാജരാക്കുന്നതിൽ സർക്കാറിന് വീഴ്ച പറ്റിയതിനാലാണ് ദൗർഭാഗ്യകരമായ ഈ വിധി ഉണ്ടായത്. കൂടാതെ മുസ്ലീം സമുദായത്തിലെ കക്ഷികളെ കേൾക്കുന്നതിലും കോടതിക്ക് വീഴ്ച സംഭവിച്ചു. പിന്നാക്ക ന്യൂനപക്ഷങ്ങളുടെ ക്ഷേമ പദ്ധതികളുമായി ബന്ധപ്പട്ട് ദൂരവ്യാപകമായ പ്രതിഫലനങ്ങൾക്ക് കാരണമാകുന്ന ഈ വിധിക്കെതിരെ വ്യത്യസ്ത സമര പരിപാടികൾ ഫ്രറ്റേണിറ്റി നടത്തി വരുന്നുണ്ട്.

അതിന്‍റെ തുടർച്ച തന്നെയാണ് ഈ നിയമ പോരാട്ടവും. ബഹുമാനപ്പെട്ട ഹൈക്കോടതി റിവ്യൂ പെറ്റിഷൻ അനുഭാവ പൂർവ്വം പരിഗണിക്കുമെന്നും സാമൂഹിക നീതി ഉയർത്തി പിടിക്കുമെന്നും കരുതുന്നതായി അദ്ദേഹം ആത്മവിശ്വാസം പ്രകടിപ്പിച്ചു.