കടം വെട്ട്​: ചെലവുകൾക്ക്​ മുൻഗണന നിശ്ചയിക്കണമെന്ന്​ മുഖ്യമന്ത്രി

തിരുവനന്തപുരം: സംസ്ഥാനത്തിന്‍റെ കടമെടുപ്പ്​ പരിധി കേന്ദ്രം വെട്ടിക്കുറച്ചതോടെ രൂക്ഷമായ സാമ്പത്തിക പ്രതിസന്ധി മറികടക്കാൻ വകുപ്പുകളുടെ ചെലവുകൾക്ക്​ മുൻഗണന നിശ്ചയിക്കണമെന്ന്​ മുഖ്യമന്ത്രി. അതേസമയം ക്ഷേമ പെൻഷൻ അടക്കം ജനങ്ങളുടെ ആനുകൂല്യങ്ങൾക്ക്​ മുടക്കം വരരുതെന്നും അദ്ദേഹം നിർദേശിച്ചു. മുഖ്യമന്ത്രി പിണറായി വിജയന്‍റെ അധ്യക്ഷതയിൽ ചേർന്ന ഉന്നതതല യോഗം സംസ്ഥാനത്തെ സാമ്പത്തിക പ്രതിസന്ധി വിലയിരുത്തി. ധനകാര്യ അഡീഷനൽ ചീഫ്​ സെക്രട്ടറി ഇതുസംബന്ധിച്ച വിശദമായ റിപ്പോർട്ട്​ അവതരിപ്പിച്ചു.

കടമെടുപ്പ്​ പരിധി കുറച്ചത്​ വലിയ പ്രശ്നമുണ്ടാക്കുമെന്നും ചെലവുകൾക്ക്​ പണം ലഭ്യമല്ലാതെ വരുമെന്നും ഇതിൽ ചൂണ്ടിക്കാണിച്ചിട്ടുണ്ട്​. പണമില്ലാത്തപ്പോൾ ചെലവിടൽ ഒരു കലയാണെന്ന്​ മുഖ്യമന്ത്രി ഇതിനോട്​ പ്രതികരിച്ചു. കടം വെട്ടിക്കുറച്ച വിഷയത്തിൽ കേന്ദ്ര​ത്തിന്​ കത്തയച്ചിട്ടും മറുപടിപോലും നൽകിയില്ലെന്നും അദ്ദേഹം ചൂണ്ടിക്കാട്ടി. കടമെടുപ്പ്​ പരിധിയിലെ കുറവ്​ വരുന്ന മാസങ്ങളിൽ ഉണ്ടാകുന്ന പ്രത്യാഘാതങ്ങളെക്കുറിച്ച്​ യോഗത്തിൽ ആശങ്ക ഉയർന്നു. സംസ്ഥാന സർക്കാറിന്‍റെ വരുമാനം കൊണ്ടുമാത്രം പിടിച്ചുനിൽക്കേണ്ട സാഹചര്യമാണ്​​. സാമ്പത്തിക പ്രതിസന്ധി രൂക്ഷമാകുമെന്നും വകുപ്പുകൾക്ക്​ ബജറ്റിൽ അനുവദിച്ച തുക നൽകാനാകാത്ത സാഹചര്യം വരുമെന്നുമാണ്​ ധനവകുപ്പ്​ വിലയിരുത്തൽ.

15,390 കോടി രൂപയാണ്​ പുതിയ സാമ്പത്തിക വർഷത്തിൽ സംസ്ഥാനത്തിന്​ കടപരിധി അനുവദിച്ചത്​. 34,000 കോടി അർഹതയുണ്ടായിരിക്കെയാണ്​ ഇത്​. ഇതിന്​ പുറമെ വിവിധ ഇനങ്ങളിലായി ലഭിച്ചിരുന്ന തുകയിലും ഇക്കുറി വൻ കുറവ്​ വന്നിട്ടുണ്ട്​. ഇതോടെ സംസ്ഥാനം വിവിധ മാർഗങ്ങളിൽ നികുതി കൂട്ടിയിട്ടും പിടിച്ചുനിൽക്കുക പ്രയാസമാകുകയാണ്​. കിഫ്​ബി, പൊതുമേഖ സ്ഥാപനങ്ങൾ എന്നിവ വഴിയുള്ള കടമെടുപ്പിന്‍റെ പേരിലാണ്​ കേന്ദ്ര സർക്കാർ കടമെടുപ്പ്​ പരിധി വെട്ടിക്കുറച്ചത്​. അനുവദിച്ചതിൽ 6000 കോടി രൂപ ഇതിനകം ചെലവിടുകയും ചെയ്തു. സാമ്പത്തിക വർഷത്തിൽ പത്ത്​ മാസം ബാക്കിയുണ്ട്​. പ്രശ്നം പരിഹരിച്ചില്ലെങ്കിൽ വാർഷിക പദ്ധതിയെ അടക്കം ഇത്​ ബാധിക്കും.