ബന്ധുക്കൾ എത്തിയില്ല; അജ്ഞാത വയോധിക​െൻറ മൃതദേഹം സർക്കാർ ആശുപത്രിയിലിരുന്ന്​ അഴുകി

നെടുങ്കണ്ടം(ഇടുക്കി): ആശുപത്രി മോർച്ചറിയിൽ സൂക്ഷിച്ചിരുന്ന മൃതദേഹം ഫ്രീസർ പ്രവർത്തിക്കാതിരുന്നതിനെ തുടർന്ന്​ അഴുകി. നെടുങ്കണ്ടം ടൗണിലെ വ്യാപാരസ്ഥാപനത്തിനു സമീപം മരിച്ച നിലയിൽ ചൊവ്വാഴ്​ച കണ്ടെത്തിയ 70 വയസ്സ്​​ തോന്നിക്കുന്ന വയോധിക​​​​െൻറ മൃതദേഹമാണ്​ ഉടുമ്പൻചോല താലൂക്ക്​ ആശുപത്രി മോർച്ചറിയിലിരുന്ന്​ അഴുകിയത്​. ഇയാളുടെ ബന്ധുക്കളെക്കുറിച്ച് വിവരം ലഭിക്കാത്തതിനാൽ ഇൻക്വസ്​റ്റ്​ തയാറാക്കി മൃതദേഹം താലൂക്ക് ആശുപത്രി മോർച്ചറിയിലേക്ക് മാറ്റുകയായിരുന്നു. 

മരണം സംഭവിച്ച് ദിവസങ്ങൾ കഴിഞ്ഞിട്ടും ബന്ധുക്കളോ സുഹൃത്തുകളോ എത്താതിരുന്നതോടെ മറവു ചെയ്യുന്നതിന് പോസ്​റ്റ്​മോർട്ടം നടപടി ആരംഭിച്ചതോടെയാണ്​ ഫ്രീസർ പ്രവർത്തിക്കാത്തതിനാൽ മൃതദേഹം തീർത്തും അഴുകിയതായി​ വ്യക്തമായത്​. ഫ്രീസർ തുറന്നതോടെ ആശുപത്രിയിലും പരിസരത്തും രൂക്ഷഗന്ധം​ വമിച്ചു​. ഇതോടെ രോഗികളും ആശുപത്രി ജീവനക്കാരും ദുരിതത്തിലായി. ഒ.പിയിൽനിന്നവർ ഡോക്ടറെ കാണാനോ മരുന്ന്​ വാങ്ങാനോ കഴിയാതെ സ്ഥലം വിട്ടു.

ഫ്രീസർ പ്രവർത്തിപ്പിക്കാതെ മൂന്ന് ദിവസം മൃതദേഹം മോർച്ചറിയിൽ സൂക്ഷിച്ചതായാണ് ആക്ഷേപം. പോസ്​റ്റ്​മോർട്ടം നടപടി പൂർത്തിയാക്കി മൃതദേഹം കൊണ്ടുപോയി മണിക്കൂറുകൾക്കുശേഷവും പ്രദേശത്ത്​ ദുർഗന്ധം നിലനിന്നു. ആശുപത്രിയിൽ ​െവെദ്യുതി മുടക്കം പതിവായിരുന്നുവെന്നും യഥാസമയം ജനറേറ്റർ പ്രവർത്തിപ്പിക്കാഞ്ഞതാണ് മൃതദേഹം അഴുകാൻ കാരണമെന്നുമാണ് കിടപ്പുരോഗികളും മറ്റും പറയുന്നത്. 

ചൊവ്വാഴ്ചയാണ് മൃതദേഹം ഇൻക്വസ്​റ്റ് തയാറാക്കി ഫ്രീസറിൽ സൂക്ഷിച്ചത്. അന്ന് ഫ്രീസറിന് ഒരു തകരാറും ഇല്ലായിരുന്നെന്നും തകരാർ ശ്രദ്ധയിൽപെട്ടിരുന്നെങ്കിൽ മൃതദേഹം മറ്റ് ആശുപത്രിയിലേക്ക് മാറ്റുമായിരുന്നെന്നും ആശുപത്രി സൂപ്രണ്ട് ഡോ. മെറിൻ പറഞ്ഞു. വ്യാഴാഴ്ച ഉച്ചക്ക്് ഫ്രീസറി​​​​െൻറ മോനിറ്റർ പ്രവർത്തിക്കുന്നില്ലെന്ന് സെക്യൂരിറ്റി അറിയിച്ചതനുസരിച്ച് പോസ്​റ്റ്​മോർട്ടത്തിന്​ നടപടിയെടുക്കുകയോ വേറെ ആശുപത്രിയിലേക്ക് മാറ്റുകയോ ചെയ്യണമെന്ന് പൊലീസ്​ സ്​റ്റേഷനിൽ  രേഖാമൂലം അറിയിച്ചിരുന്നു.

എന്നാൽ, വെള്ളിയാഴ്ചയാണ് പൊലീസ്​ എത്തിയതെന്ന്​ സൂപ്രണ്ട് പറഞ്ഞു. പൊലീസി​​​​െൻറ ഭാഗത്തുനിന്ന്​ നടപടിക്രമങ്ങൾ പൂർത്തിയാക്കിയാണ് മൃതദേഹം ആശുപത്രിയിൽ എത്തിച്ചതെന്നും ബന്ധുക്കൾ എത്തിയില്ലെങ്കിൽ പോസ്​റ്റ്​മോർട്ടം അടക്കം നടപടിയെടുത്ത്​ മൃതദേഹം മറവ് ചെയ്യേണ്ട ജോലി പഞ്ചായത്തിനാണെന്നും നെടുങ്കണ്ടം സി.ഐ അയ്യൂബ്ഖാൻ പറഞ്ഞു.