മെഡിക്കൽ കോളജിലെ ഡി.വൈ.എഫ്.ഐ അക്രമം: പ്രതികളെ അറസ്റ്റ് ചെയ്യാത്തത് പൊലീസ് ഒത്തുകളിയുടെ ഭാഗം -കോൺഗ്രസ്
text_fields
കോഴിക്കോട്: കോഴിക്കോട് മെഡിക്കൽ കോളജിൽ സെക്യൂരിറ്റി ജീവനക്കാരൻ ദിനേശനെയും 'മാധ്യമം' റിപ്പോർട്ടർ ഷംസുദ്ദീനെയും ഡി.വൈ.എഫ്.ഐ പ്രവർത്തകർ ക്രൂരമായി മർദിച്ച സംഭവത്തിൽ ഇതുവരെ പ്രതികളെ അറസ്റ്റ് ചെയ്യാത്തത് ഒത്തുകളിയുടെ ഭാഗമാണെന്ന് കോഴിക്കോട് ഡി.സി.സി പ്രസിഡൻറ് കെ. പ്രവീൺകുമാർ ആരോപിച്ചു. ഡി.വൈ.എഫ്.ഐ നടത്തിയ നരനായാട്ടിനെതിരെ നടപടി സ്വീകരിച്ചില്ലെങ്കിൽ പൊലീസിനെതിരെ നീങ്ങേണ്ടി വരുമെന്ന് അദ്ദേഹം മുന്നറിയിപ്പ് നൽകി. കോഴിക്കോട് സ്വകാര്യ ആശുപത്രിയിൽ ചികിത്സയിൽ കഴിയുന്ന ദിനേശനെ സന്ദർശിച്ച ശേഷം മാധ്യമപ്രവർത്തകരോട് സംസാരിക്കുകയായിരുന്നു ഡിസിസി പ്രസിഡൻറ്.
ക്രൂരമർദനമേറ്റ സെക്യൂരിറ്റി ജീവനക്കാരൻ ദിനേശന് വിദഗ്ധ ചികിത്സ ലഭ്യമാക്കാൻ സംസ്ഥാന സർക്കാർ അടിയന്തരമായി ഇടപെടണം. ഡി.വൈഎഫ്ഐക്കാരുടെ അഴിഞ്ഞാട്ടം ചിത്രീകരിച്ച മാധ്യമം ദിനപത്രത്തിന്റെ റിപ്പോർട്ടർ ഷംസുദ്ദീന് ഗുരുതരമായി മർദ്ദനമേറ്റ സംഭവത്തിലും ഇതുവരെ നടപടി സ്വീകരിക്കാൻ പൊലീസ് തയ്യാറായിട്ടില്ല.
ജീവനക്കാരന് മർദ്ദനമേറ്റ സംഭവത്തിൽ ആരോഗ്യ മന്ത്രിയോ മെഡിക്കൽ കോളേജ് അധികൃതരോ ഇതുവരെ യാതൊരു പ്രതികരണവും നടത്തിയിട്ടില്ല. ജീവനക്കാരനെ സന്ദർശിക്കാൻ പോലും മെഡിക്കൽ കോളജ് അധികൃതർ തയ്യാറായിട്ടില്ല. മർദനത്തിന്റെ സിസിടിവി ദൃശ്യങ്ങൾ ലഭ്യമായിട്ടും ഇതുവരെ പ്രതികളെ അറസ്റ്റ് ചെയ്യാത്തത് ഒത്തുകളിയുടെ ഭാഗമാണ്.
ഹൃദയസംബന്ധമായ അസുഖത്തിനും നട്ടെല്ലിന് ഏറ്റ ക്ഷതത്തിനും ചികിത്സയിലുള്ള വ്യക്തിയാണ് ദിനേശൻ. കുടുംബ പ്രാരാബ്ദങ്ങളെ തുടർന്നാണ് സൈന്യത്തിൽ നിന്ന് വിരമിച്ച ശേഷവും കോഴിക്കോട് മെഡിക്കൽ കോളജിൽ സെക്യൂരിറ്റി ജോലിയിൽ പ്രവേശിച്ചത്. തൻറെ ജോലി കൃത്യമായി നിർവഹിച്ച ജീവനക്കാരനെ അധികാരത്തിന്റെ അഹങ്കാരത്തിൽ ആക്രമിച്ച നടപടി ഡി.വൈ.എഫ്.ഐ തുടർന്നുപോരുന്ന കാടത്തത്തിന്റെ അവസാനത്തെ ഉദാഹരണമാണെന്നും കെ. പ്രവീൺകുമാർ പറഞ്ഞു. ദിനേശനും കുടുംബത്തിനും നീതി ലഭ്യമാക്കുന്നതിനായി കോൺഗ്രസ് എല്ലാവിധത്തിലുള്ള പിന്തുണയും നൽകുമെന്നും ഡി.സി.സി പ്രസിഡന്റ് പറഞ്ഞു.
ആഗസ്റ്റ് 31നാണ് കോഴിക്കോട് മെഡിക്കൽ കോളജ് ആശുപത്രിയിൽ സെക്യൂരിറ്റി ജീവനക്കാർക്കും രോഗികളുടെ കൂട്ടിരിപ്പുകാർക്കും മാധ്യമപ്രവർത്തകനും ഡി.വൈ.എഫ്.ഐക്കാരുടെ മർദനമേറ്റത്. ബുധനാഴ്ച രാവിലെ 10ഓടെ സന്ദർശകഗേറ്റിലാണ് സംഭവം. ഡി.വൈ.എഫ്.ഐ ജില്ല ജോ. സെക്രട്ടറിയും സംസ്ഥാന കമ്മിറ്റി അംഗവുമായ കെ. അരുണിന്റെ നേതൃത്വത്തിലാണ് ആക്രമണം നടത്തിയതെന്ന് സി.സി.ടി.വി ദൃശ്യങ്ങൾ പരിശോധിച്ച പൊലീസ് തിരിച്ചറിഞ്ഞിരുന്നു.
ഡി.വൈ.എഫ്.ഐ നേതാവിന്റെ കുടുംബത്തെ ആശുപത്രിയിലേക്ക് കടത്തിവിടുന്നതുമായി ബന്ധപ്പെട്ട് സെക്യൂരിറ്റി ജീവനക്കാരുമായുള്ള തർക്കമാണ് ആക്രമണത്തിൽ കലാശിച്ചത്. സംഘർഷവിവരമറിഞ്ഞ് മെഡിക്കൽ കോളജ് ആശുപത്രിയിലെത്തിയ 'മാധ്യമം' സീനിയർ റിപ്പോർട്ടർ പി. ഷംസുദ്ദീനുനേരെയും ആക്രമണമുണ്ടായി. ദൃശ്യങ്ങൾ പകർത്താൻ ശ്രമിച്ചപ്പോൾ ആക്രമികൾ ചാടിവീഴുകയായിരുന്നു. മൊബൈൽഫോൺ പിടിച്ചുവാങ്ങിയശേഷം ക്രൂരമായി മർദിക്കുകയും കഴുത്തിനുപിടിച്ച് തിരിക്കുകയും ചെയ്തു. ഫോൺ തിരിച്ചുകിട്ടാൻ സമീപിച്ചപ്പോൾ സംഘം വീണ്ടും മർദിച്ചു. തുടർന്ന് മെഡിക്കൽ കോളജ് പൊലീസ് സ്റ്റേഷനിലേക്ക് ഓടിക്കയറിയപ്പോഴാണ് ആക്രമികൾ പിന്തിരിഞ്ഞത്.