ഭരണകൂടങ്ങൾ ജനാധിപത്യ മൂല്യങ്ങൾ സംരക്ഷിക്കണം -ദയാബായി

കാസർകോട്​: ജനങ്ങൾ തെരഞ്ഞെടുത്ത് അധികാരത്തിലേറിയ സർക്കാറുകൾ ജനതാൽപര്യം സംരക്ഷിക്കുന്നവരാകണമെന്ന് സാമൂഹിക പ്രവർത്തക ദയാബായി ഭരണകൂടത്തോട്​ ആവശ്യപ്പെട്ടു. കളവുപറഞ്ഞ് പറ്റിക്കാത്ത സമീപനമാണ് സർക്കാർ എടുക്കേണ്ടതെന്ന് അവർ പറഞ്ഞു.

ദുരിതബാധിതരെ ഇനിയുമൊരു സമരത്തിലേക്ക്​ വലിച്ചിഴക്കാൻ അവസരമുണ്ടാക്കരുതെന്ന് അവർ സർക്കാറിനെ ഓർമിപ്പിച്ചു. പ്രശ്നങ്ങളിൽ ഇടപെടാൻ യുവജനത തയാറാകണമെന്നും അവർ യുവാക്കളോട് ആവശ്യപ്പെട്ടു. എൻഡോസൾഫാൻ പീഡിത ജനകീയമുന്നണിയുടെ നേതൃത്വത്തിൽ എൻഡോസൾഫാൻ ദുരിതബാധിതരുടെ പ്രശ്നങ്ങൾ ചർച്ചചെയ്യാൻ  കാസർകോട്​ മുനിസിപ്പൽ കോൺഫറൻസ് ഹാളിൽ സംഘടിപ്പിച്ച ജനകീയ കൂട്ടായ്മ ഉദ്ഘാടനം ചെയ്യുകയായിരുന്നു ദയാബായി.