ദലിത് യുവാക്കള്‍ക്ക് മര്‍ദനം: വസ്തുതാന്വേഷണ സംഘം തെളിവെടുത്തു

കൊല്ലം: അഞ്ചാലുംമൂട്, വെസ്റ്റ് പൊലീസ് സ്റ്റേഷനുകളില്‍ ദലിത് യുവാക്കള്‍ക്ക് മര്‍ദനമേറ്റ സംഭവത്തില്‍ എന്‍.കെ. പ്രേമചന്ദ്രന്‍ എം.പിയുടെ നേതൃത്വത്തില്‍ ജനകീയ വസ്തുതാന്വേഷണസംഘം തെളിവെടുപ്പ് നടത്തി. യുവാക്കള്‍ക്ക് നേരെയുണ്ടായത് പരിഷ്കൃത സമൂഹത്തില്‍ സംഭവിക്കാന്‍ പാടില്ലാത്തതാണെന്ന് പ്രേമചന്ദ്രന്‍ മാധ്യമപ്രവര്‍ത്തകരോട് പറഞ്ഞു. അന്വേഷണസംഘത്തിലെ അംഗങ്ങളായ അഡ്വ. പി.എ. പൗരന്‍, ജില്ലാ പഞ്ചായത്ത് മുന്‍ പ്രസിഡന്‍റ് കെ. ദേവകി, മാധ്യമ പ്രവര്‍ത്തകന്‍ എന്‍.കെ. രവീന്ദ്രന്‍, നാടകസംവിധായികയും തിയറ്റര്‍ ആക്ടിവിസ്റ്റുമായ ജെ. ശൈലജ എന്നിവരും പ്രേമചന്ദ്രനോടൊപ്പം ഉണ്ടായിരുന്നു.
അറസ്റ്റ് ചെയ്യുമ്പോള്‍ പാലിക്കണമെന്ന് സുപ്രീംകോടതി നിര്‍ദേശിച്ചിട്ടുള്ള എല്ലാ മാനദണ്ഡങ്ങളും അഞ്ചാലുംമൂട്, കൊല്ലം വെസ്റ്റ് പൊലീസ് സ്റ്റേഷനുകളില്‍ ലംഘിച്ചതായി കമീഷന്‍െറ പ്രാഥമിക തെളിവെടുപ്പില്‍ കണ്ടത്തെി. വെസ്റ്റ് സി.ഐ, അഞ്ചാലുമൂട് എസ്.ഐ എന്നിവരടക്കം കുറ്റക്കാരായ മുഴുവന്‍ ഉദ്യോഗസ്ഥരെയും മാറ്റിനിര്‍ത്തി സംഭവത്തില്‍ സര്‍ക്കാര്‍ അന്വേഷണം നടത്തണമെന്ന് കമീഷന്‍ അഭിപ്രായപ്പെട്ടു.