നിദ ഫാത്തിമയുടെ മരണം: സൈക്കിൾ പോളോ ഫെഡറേഷൻ ഭാരവാഹികൾ ഹാജരാകണമെന്ന്​ ഹൈകോടതി

കൊച്ചി: ദേശീയ സൈക്കിൾ പോളോ ചാമ്പ്യൻഷിപ്പിൽ പങ്കെടുക്കാൻ നാഗ്പുരിലെത്തിയ പത്ത്​ വയസ്സുകാരി നിദ ഫാത്തിമയുടെ മരണത്തിൽ ഹൈകോടതിയുടെ ഇടപെടൽ. മരണത്തിന് സൈക്കിൾ പോളോ ഫെഡറേഷൻ ഓഫ് ഇന്ത്യ ഭാരവാഹികൾ ഉത്തരവാദികളാണെന്നാ​രോപിച്ച്​ കേരള സൈക്കിൾ പോളോ അസോസിയേഷൻ നൽകിയ കോടതിയലക്ഷ്യ ഹരജിയാണ്​ ജസ്റ്റിസ്​ വി.ജി. അരുൺ പരിഗണിച്ചത്​.

ഭക്ഷ്യവിഷബാധയെ തുടർന്നു ചികിത്സക്കിടെ കുട്ടി മരിച്ച സംഭവത്തിൽ ഫെഡറേഷൻ സെക്രട്ടറി, സൈക്കിൾ പോളോ അസോസിയേഷൻ ഓഫ് കേരള സെക്രട്ടറി എന്നിവർ ജനുവരി 12ന് നേരിട്ട് ഹാജരാകാൻ കോടതി നിർദേശിച്ചു.

ഹൈകോടതിയുടെ ഉത്തരവോടെ മത്സരിക്കാനെത്തിയ ടീമിന്​ ഭക്ഷണം, താമസം, ഗതാഗത സൗകര്യം തുടങ്ങിയവ നൽകിയില്ലെന്നും ചാമ്പ്യൻഷിപ്പിൽ പങ്കെടുക്കാൻ അനുവദിച്ചില്ലെന്നും ഹൈകോടതിയുടെ 15ലെ ഉത്തരവുകൾ ലംഘിച്ചെന്നും ആരോപിച്ചാണ്​ ഹരജി. ടീം അംഗങ്ങൾക്ക് ഭക്ഷണവും താമസവും നൽകാതിരുന്നതിനാൽ പ്രദേശത്തെ ഡോർമിറ്ററിയിൽ താമസിക്കേണ്ടിവന്നു. ഇവിടെവെച്ച്​ രോഗബാധിതയായ നിദയെ ആശുപത്രിയിൽ എത്തിച്ചെങ്കിലും വ്യാഴാഴ്ച രാവിലെ പത്തിന് മരിച്ചു.

കേരള സൈക്കിൾ പോളോ അസോസിയേഷൻ തെരഞ്ഞെടുത്ത ടീമെന്ന നിലയിൽ മത്സരത്തിൽ പ​ങ്കെടുക്കാൻ ഹൈകോടതി ഉത്തരവോടെയെത്തിയവർക്ക്​ സൗജന്യ താമസം ഉൾപ്പെടെ നൽകാനുള്ള ഉത്തരവാദിത്തം സൈക്കിൾ പോളോ ഫെഡറേഷനുണ്ടെന്നാണ്​ ഹരജിയിലെ ആരോപണം. ഫെഡറേഷന്‍റെ പേരിൽ 50,000 രൂപ അസോസിയേഷൻ അടച്ചിരുന്നു.

കേരള സ്പോർട്സ് കൗൺസിലിന്റെ ധനസഹായത്തോടെയാണ്​ നാഗ്പുരിൽ 21ന് ടീം എത്തിയത്. പങ്കെടുക്കാൻ കഴിയില്ലെന്നാണ് അറിയിച്ചതെങ്കിലും കേന്ദ്ര യുവജന -കായിക മന്ത്രാലയം വിശദീകരണം ചോദിച്ചതോടെ അനുമതി നൽകി. ഭക്ഷണവും താമസവും നൽകാത്തതിനെക്കുറിച്ച്​ കേന്ദ്ര മന്ത്രാലയം ആരാഞ്ഞപ്പോൾ സൈക്കിൾ പോളോ അസോസിയേഷൻ ഓഫ് കേരള സ്പോൺസർ ചെയ്ത ടീമിന്​ ഭക്ഷണവും താമസവും നൽകിയെന്ന മറുപടിയാണ്​ നൽകിയത്​.

ഭക്ഷണവും താമസവും നൽകാനുള്ള ഉത്തരവില്ലെന്നും തങ്ങളുടെ ടീം പങ്കെടുക്കുന്നതിനെ കോടതി വിലക്കിയിട്ടില്ലെന്നുമായിരുന്നു സൈക്കിൾ പോളോ അസോസിയേഷൻ ഓഫ് കേരളയുടെ നിലപാടെന്നും വ്യക്തമാക്കി.