നിലവിൽ മൂന്നു മാസത്തെ പെൻഷൻ കുടിശ്ശിക -കെ.എൻ. ബാലഗോപാൽ

തിരുവനന്തപുരം : നിലവിൽ മൂന്നു മാസത്തെ പെൻഷൻ കുടിശ്ശികയാണെന്ന് മന്ത്രി കെ.എൻ. ബാലഗോപാൽ. എം.പി.അനിൽ കുമാർ, ഐ.സി ബാലകൃഷ്ണൻ, കെ.കെ ശൈലജ, എൽദോസ് പി. കുന്നപ്പിള്ളിൽ എന്നിവർക്ക് മന്ത്രി മറുപടി നൽകി.

2024-25 ബജറ്റ് പ്രസംഗത്തിൻറെ അടിസ്ഥാനത്തിൽ 2024 ഏപ്രിൽ മാസം മുതൽ മുടക്കം കൂടാതെ എല്ലാ മാസങ്ങളിലും സാമൂഹ്യ സുരക്ഷാ- ക്ഷേമനിധി ബോർഡ് പെൻഷനുകൾ അനുവദിച്ച് വിതരണം നടത്തി വരുന്നു.

പണഞെരുക്കം കാരണമുണ്ടായ സാമൂഹ്യക്ഷേമ ഗുണഭോക്താക്കൾക്ക് പെൻഷൻ 2024-25 കുടിശ്ശിക, സാമ്പത്തിക വർഷത്തിൽ രണ്ടു ഗഡുക്കളും 2025 -26 -ൽ മൂന്നു ഗഡുക്കളും വിതരണം ചെയ്യാൻ ഉദ്ദേശിക്കുന്നു" എന്ന് പതിനഞ്ചാം നിയമസഭയുടെ പതിനൊന്നാം സമ്മേളനത്തിൽ മുഖ്യമന്ത്രി ചട്ടം 300 പ്രകാരം പ്രസ്താവിച്ചിരുന്നു.

ഓണത്തോടനുബന്ധിച്ച് 2024 സെപ്റ്റംബർ മാസത്തിലും 2025 ജനുവരി മാസത്തിലും ഒരു മാസത്തെ സാമൂഹ്യ സുരക്ഷ പെൻഷൻ-ക്ഷേമനിധി ബോർഡ് പെൻഷൻ അനുവദിച്ചതിനോടൊപ്പം ഓരോ ഗഡു കുടിശ്ശികയും അനുവദിച്ച് വിതരണം നടത്തി. മുഖ്യമന്ത്രിയുടെ പ്രസ്താവനയുടെ അടിസ്ഥാനത്തിൽ നിലവിലെ കടിശ്ശിക അടുത്ത സാമ്പത്തിക വർഷത്തിൽ തന്നെ അനുവദിക്കുന്നതിനുള്ള നടപടികൾ സർക്കാർ സ്വീകരിക്കുമെന്നും മന്ത്രി നിയമസഭയെ രേഖാമൂലം അറിയിച്ചു.