പിഞ്ചു കുഞ്ഞിന് ക്രൂരമർദനം, വിറകുകൊള്ളി കൊണ്ട് അടിച്ചു; രണ്ടാനച്ഛനും അമ്മയും അറസ്റ്റിൽ

കണ്ണൂർ: കേളകം കണിച്ചാറിൽ ഒരു​ വയസായ പെൺകുഞ്ഞിനെ ക്രൂരമായി മർദിച്ച സംഭവത്തിൽ ​രണ്ടാനച്ഛനെയും അമ്മയെയും അറസ്റ്റ് ചെയ്തു. മർദനത്തിൽ തലക്കും കൈക്കും പരിക്കേറ്റ കുഞ്ഞിനെ പരിയാരം മെഡിക്കൽ കോളജ്​ ആശുപത്രിയിൽ പ്രവേശിപ്പിച്ചിരിക്കുകയാണ്​. കുഞ്ഞിന്‍റെ രണ്ടാനച്ഛൻ കൊട്ടിയൂർ പാലുകാച്ചിയിലെ പുത്തൻവീട്ടിൽ രതീഷി(43)നെയും അമ്മ ചെങ്ങോം വിട്ടയത്ത്​ രമ്യ(24)യെയുമാണ് അറസ്റ്റ് ചെയ്തത്.

ശനിയാഴ്ചയായിരുന്നു മർദനം. വീടിനകത്ത് മൂത്രമൊഴിച്ചതിനാണത്രെ കുഞ്ഞിനെ രണ്ടാനച്ഛൻ ക്രൂരമായി മർദിച്ചത്. വിറകുകൊള്ളി കൊണ്ട് കുഞ്ഞിനെ അടിക്കുകയായിരുന്നു. കുഞ്ഞിന്‍റെ മുത്തശ്ശിയുടെ പരാതിയിലാണ് ​കേളകം ​പൊലീസ്​ കേസെടുത്തത്. കുഞ്ഞിനെ മർദിക്കുന്നത്​ തടയാതിരുന്നതിനാണ്​​ അമ്മയെയും അറസ്റ്റ് ചെയ്തത്​. ജുവനൈൽ ജസ്റ്റിസ്​ ആക്​ട്​ പ്രകാരമാണ്​ കേസ്​.

മുഖത്തും തലയുടെ മറ്റു ഭാഗങ്ങളിലും പരിക്കേറ്റ കുഞ്ഞിനെ രമ്യയുടെ മാതാപിതാക്കളാണ്​ ആശുപത്രിയിലെത്തിച്ചത്​. ആശുപത്രി അധികൃതർ പിന്നീട്​ പൊലീസിനെ അറിയിക്കുകയായിരുന്നു. രതീഷ്​ കുഞ്ഞിന്​ പാലുകൊടുക്കാൻ പോലും സമ്മതിച്ചിരുന്നില്ലെന്ന്​ കുഞ്ഞിന്‍റെ മുത്തശ്ശി പറഞ്ഞു. കുഞ്ഞിനെ രതീഷിന്​ ഇഷ്​ടമല്ലായിരുന്നുവെന്നും പറയുന്നു.