മുസ്​ലിം ലീഗിനെ വിമർശിക്കുന്നത്​ രാഷ്​ട്രീയ പാർട്ടിയെന്ന നിലക്ക്​, വർഗീയമായി കാണേണ്ട -മുഖ്യമ​​ന്ത്രി

തിരുവനന്തപുരം: മുസ്​ലിം ലീഗിനെ വിമർശിക്കുന്നത്​ രാഷ്​ട്രീയ പാർട്ടി എന്ന നിലക്കാ​െണന്നും അത്​ വർഗീയമായി കാണേണ്ടെന്നും മുഖ്യമ​ന്ത്രി പിണറായി വിജയൻ. ജമാഅത്തെ ഇസ്​ലാമിയുമായി കൂട്ടുകെട്ടുണ്ടാക്കാൻ നേതൃത്വം നൽകിയത്​ ലീഗാണ്​. അത്​ നാട്ടിൽ അംഗീകരിക്കാനാകാത്ത കാര്യമാണ്​. തദ്ദേശ തെരഞ്ഞെടുപ്പിന്​ ശേഷമാണെങ്കിലും യു.ഡി.എഫ്​ തന്നെ തിരുത്തി.

എന്നാൽ, ലീഗ്​ വീണ്ടും ജമാഅത്തെ ഇസ്​ലാമിയുമായി ബന്ധപ്പെടാൻ ശ്രമങ്ങൾ നടത്തു​േമ്പാൾ അത്​ വിമർശിക്കപ്പെടും. ലീഗിനെ വിമർശിച്ചാൽ അതിന്​ ​പിന്നിൽ എന്താണ്​ വർഗീയതയെന്നും അദ്ദേഹം വാർത്തസ​േമ്മളനത്തിൽ ചോദിച്ചു.

നാല്​ സീറ്റിനും ചില്ലറ വോട്ടിനും വേണ്ടി വർഗീയതയോട്​ സമരസപ്പെടുന്നത്​ നാടിന്​ ചേർന്നതല്ല. വർഗീയ പ്രചാരണങ്ങൾ എല്ലാവരും നടത്താറില്ല. പക്ഷേ, വർഗീയശക്തികൾ എ​ല്ലാം വർഗീയാടിസ്ഥാനത്തിലേ കാണൂ. അതിനെ നേരിടാൻ മതനിര​േപക്ഷ പാർട്ടികൾക്ക്​ സാധിക്കണം. എൽ.ഡി.എഫ്​ എല്ലാ ഘട്ടത്തിലും മതനിരപേക്ഷതയിൽ ഉറച്ചുള്ള നിലപാടേ സ്വീകരിച്ചിട്ടുള്ളൂ.

വർഗീയതയോട്​ ഒരു ഘട്ടത്തിൽപോലും സമരസപ്പെട്ടിട്ടില്ല. വിട്ടുവീഴ്​ചയില്ലാത്ത നിലപാടാണ്​ ഇൗ വിഷയത്തിൽ എൽ.ഡി.എഫ്​ എന്നും കൈക്കൊണ്ടിട്ടുള്ളത്​. നിർഭാഗ്യവശാൽ യു.ഡി.എഫിന്​ അത്തരം നിലപാടല്ല ഉള്ളത്​. ഭൂരിപക്ഷ-ന്യൂനപക്ഷ വ്യത്യാസമില്ലാതെ കേരളത്തിലെ ബഹുഭൂരിപക്ഷവും മതനിരപേക്ഷത സംരക്ഷിക്കപ്പെടണമെന്ന്​ ആഗ്രഹിക്കുന്നവരാണ്​. അവർക്കൊപ്പമാണ്​ തങ്ങൾ. അത്​ ജനങ്ങൾക്കറിയാം. വർഗീയതയുമായി സമരസമുണ്ടാക്കുന്നവർ അവർക്കും നാടിനും അത്​ ഹാനികരമാകുമെന്ന്​ ഒാർത്താൽ നന്നെന്ന്​ അദ്ദേഹം യു.ഡി.എഫിനോടായി പറഞ്ഞു.

പൊതുപിരിവ്​ നടത്തുന്നവർ എന്ത്​ ഉദ്ദേശത്തിലാണോ അത്​ നടത്തുന്നത്​ അതിൽ സുതാര്യത വേണമെന്നായിരുന്നു യൂത്ത്​ ലീഗുമായി ബന്ധപ്പെട്ട പണപ്പിരിവ്​ സംബന്ധിച്ച ചോദ്യത്തിന്​ മുഖ്യമന്ത്രിയുടെ മറുപടി. ഇത്തരത്തിലുള്ള പണപ്പിരിവുകളിൽ പരാതിയുണ്ടായാൽ അത്​ പരിശോധിക്കുമെന്നാണ്​ സർക്കാർ നിലപാട്​.

പിരിക്കുന്ന പണം ദുർവ്യയം ചെയ്യാൻ പാടില്ല. ചിലർ അങ്ങനെ നടത്തുന്നതായി​ ആക്ഷേപമുണ്ട്​. ചിലർക്കെതിരെ ആവർത്തിച്ച്​ ഇത്തരം ആക്ഷേപം ഉയരുന്നുമുണ്ട്​. അങ്ങനെയുള്ളവർ തങ്ങളുടെ വിശ്വാസ്യത പോയെന്ന്​ മനസ്സിലാക്കണമെന്നും മുഖ്യമന്ത്രി പറഞ്ഞു.