സി.പി.എം സമ്മേളനത്തിൽ ഗുരുവായൂർ ദേവസ്വം ചെയർമാന്​ വിമർശനം; തന്നിഷ്ടപ്രകാരം പ്രവർത്തിക്കുന്നുവെന്ന് പ്രതിനിധികൾ

തൃശൂർ: സി.പി.എം തൃശൂർ ജില്ല സമ്മേളനത്തിൽ ഗുരുവായൂർ ദേവസ്വം ചെയർമാൻ അഡ്വ. കെ.ബി. മോഹൻദാസിന്​ വിമർശനം. പാർട്ടി ചാവക്കാട്​ ഏരിയ കമ്മിറ്റിയിൽ നിന്നുള്ള പ്രതിനിധികളാണ്​ ചെയർമാനെതിരെ നിലപാടെടുത്തത്​.

ചെയർമാൻ തന്നിഷ്ടപ്രകാരം പ്രവർത്തിക്കുന്നുവെന്നും പാർട്ടി നേതാക്കളുടെ അഭിപ്രായം മുഖവിലക്കെടുക്കുന്നില്ലെന്നും പ്രതിനിധികൾ കുറ്റപ്പെടുത്തി. ചെയർമാന്‍റെ ഈ സമീപനം ഏരിയയിലെ പാർട്ടി നേതാക്കൾക്ക്​ അവമതിപ്പ്​ ഉണ്ടാക്കുന്നുണ്ടെന്നും അവർ പറഞ്ഞു.

ചെയർമാൻ സ്ഥാനത്ത്​ മോഹൻദാസ്​ നാളെ കാലാവധി പൂർത്തിയാക്കാനിരിക്കെയാണ്​ സമ്മേളനത്തിൽ വിമർശനം വന്നത്​.

കെ റെയിൽ പദ്ധതി വികസനത്തിന്‍റെ രജതരേഖ എന്ന് സി.പി.എം സമ്മേളനം

കെ റെയിൽ സിൽവർ ലൈൻ പദ്ധതി കേരള വികസനത്തിന്‍റെ രജത രേഖയാണെന്നും വികസന സ്വപ്നങ്ങൾക്ക് ചിറക്​ നൽകുന്നതാന്നെന്നും സി.പി.എം തൃശൂർ ജില്ല സമ്മേളനം അംഗീകരിച്ച പ്രമേയം വിലയിരുത്തി. സ്ഥാപിത താൽപര്യക്കാരായ പ്രതിപക്ഷ കക്ഷികൾ പദ്ധതിക്ക് തുരങ്കം വെക്കാൻ ശ്രമിക്കുകയാണ്.

നാടിന്‍റെ മെച്ചപ്പെട്ട പുരോഗതിക്ക് സഹായകരമായി മാറുന്ന കെ റെയിൽ പദ്ധതി നടപ്പാക്കണമെന്നും ജില്ല സമ്മേളനം ആവശ്യപ്പെട്ടു.