യുവതിയെ മർദ്ദിച്ച ബി.ജെ.പി നേതാവും സഹോദരനും റിമാൻഡിൽ

അമ്പലപ്പുഴ: യുവതിയെ മർദ്ദിച്ച സംഭവത്തിൽ ബി.ജെ.പി നേതാവും സഹോദരനും റിമാൻഡിൽ. ബി.ജെ.പി പ്രാദേശികനേതാവ്​ അമ്പലപ്പുഴ വടക്ക് പഞ്ചായത്ത് 17ാം വാർഡിൽ മാടവനത്തോപ്പി ബിനു (47), സഹോദരൻ വിജിലാൽ(44) എന്നിവരാണ് റിമാൻഡിലായത്. ബിനുവി​​െൻറ ഭാര്യ സ്മിത, വിജിലാലി​​െൻറ ഭാര്യ സിൽവിയ എന്നിവർക്കുവേണ്ടി അന്വേഷണം നടത്തിവരുകയാണെന്ന് അമ്പലപ്പുഴ പൊലീസ് പറഞ്ഞു. 

ആലപ്പുഴ ഫയർ സ്​റ്റേഷനിലെ മെക്കാനിക്ക് അമ്പലപ്പുഴ വടക്ക് പഞ്ചായത്ത് 17ാം വാർഡിൽ വണ്ടാനം തൈപ്പറമ്പിൽ (സ്നേഹാലയം) പ്രിയധര​​െൻറ ഭാര്യ സ്നേഹ (39)ക്കാണ് മർദ്ദനമേറ്റത്. കമ്പി വടികൊണ്ടുള്ള അടിയേറ്റ് ഇടതു കൈക്കും തലക്കും പരിക്കേറ്റ സ്നേഹയെ വണ്ടാനം മെഡിക്കൽ കോളജ് ആശുപത്രിയിൽ പ്രവേശിപ്പിച്ചിരുന്നു. കഴിഞ്ഞ വ്യാഴാഴ്ച വൈകിട്ട് അ​ഞ്ചോടെയായിരുന്നു സംഭവം. 

സ്നേഹയുടെ ഉടമസ്ഥതയിലുള്ള ആൾ താമസമില്ലാത്ത വീട് വൃത്തിയാക്കാനെത്തിയപ്പോൾ സമീപവാസികളായ ബിനു, ബിജിലാൽ, സ്മിത, സിൽവിയ എന്നിവർ ചേർന്ന് മർദ്ദിക്കുകയായിരുന്നെന്ന് പൊലീസ് പറഞ്ഞു. സ്നേഹയെ നാട്ടുകാരാണ് ആശുപത്രിയിൽ എത്തിച്ചത്. സംഭവശേഷം ഒളിവിലായിരുന്ന ബിനുവിനെയും വിജിലാലിനെയും കഴിഞ്ഞ ദിവസമാണ് അറസ്​റ്റ്​ ചെയ്ത് കോടതിയിൽ ഹാജരാക്കിയത്. രണ്ടുവർഷം മുമ്പ് സ്നേഹയുടെ സ്ഥലം കൈയേറി ഇവർ സെപ്ടിക് ടാങ്ക് സ്ഥാപിച്ചിരിന്നു. ഇതിനെതിരെ പരാതി നൽകിയതി​​െൻറ പേരിൽ സ്നേഹയെ വഴിയിൽ തടഞ്ഞു നിർത്തി  അക്രമിച്ചിരുന്നു. ഈ കേസി​​െൻറ വിചാരണ നടക്കാനിരിക്കെയാണ് വീണ്ടും ആക്രമണമുണ്ടായത്.